ന്യൂഡല്‍ഹി: ചരിത്രം കുറിച്ച് ദ്രൗപദി മുര്‍മു. പ്രതിപക്ഷ പൊതുസ്ഥാനാര്‍ഥി യശ്വന്ത് സിന്‍ഹയെ വന്‍ഭൂരിപക്ഷത്തില്‍ പിന്നിലാക്കി രാജ്യത്തിന്റെ പതിനഞ്ചാമത് രാഷ്ട്രപതിയായി ദ്രൗപദി മുര്‍മുവിനെ തിരഞ്ഞെടുക്കപ്പെട്ടു.

ഇന്ന് ഉച്ചയ്ക്കാണ് വോട്ടെണ്ണല്‍ തുടങ്ങിയത്. ആകെയുള്ള 3,219 വോട്ടുകളില്‍ മുര്‍മുവിന് 2,161 വോട്ടുകളും (വോട്ടുമൂല്യം - 5,77,777), യശ്വന്ത് സിന്‍ഹയ്ക്ക് 1,058 വോട്ടുകളും (വോട്ടുമൂല്യം - 2.61.062) ലഭിച്ചു. പാര്‍ലമെന്റ് അംഗങ്ങളുടെ വോട്ടാണ് ആദ്യം എണ്ണിയത്. പോള്‍ ചെയ്ത 748 വോട്ടുകളില്‍ 540 വോട്ടുകള്‍ ദ്രൗപദിക്ക് ലഭിച്ചു. യശ്വന്ത് സിന്‍ഹയ്ക്ക് 204 വോട്ടാണ് ലഭിച്ചത്.

5.2 ലക്ഷമാണ് എം.പിമാരുടെ വോട്ടുകളുടെ മൂല്യം. ഇത് അനുസരിച്ച് ദ്രൗപദിക്ക് 3.8 ലക്ഷം മൂല്യമുള്ള വോട്ടും യശ്വന്ത് സിന്‍ഹയ്ക്ക് 1.4 ലക്ഷം മൂല്യത്തിന്റെ വോട്ടുമാണ് ലഭിച്ചിരിക്കുന്നത്. കേരളമടക്കം സംസ്ഥാനങ്ങളിലെ എം.എല്‍.എമാരുടെ വോട്ടണ്ണല്‍ പൂര്‍ത്തിയായപ്പോള്‍ തന്നെ ദ്രൗപദി വിജയമുറപ്പിച്ചിരുന്നു.