മുണ്ടക്കൈ: ഉരുള്‍പൊട്ടലില്‍ വനത്തിനുള്ളില്‍ ഒറ്റപ്പെട്ട നാല് കുഞ്ഞുങ്ങള്‍ക്ക് രക്ഷകരായി വനംവകുപ്പ് ഉദ്യോഗസ്ഥര്‍. കല്‍പറ്റ റേഞ്ച് ഓഫിസര്‍ ആഷിഖിന്റെ നേതൃത്വത്തിലാണ് അട്ടമലയിലെ കാട്ടില്‍ കുടുങ്ങിക്കിടന്ന കുടുംബത്തെ സാഹസികമായി രക്ഷപ്പെടുത്തിയത്. ആദിവാസിയായ കൃഷ്ണന്റെ നാലു കുട്ടികളെയാണ് സൂചിപ്പാറ വെള്ളച്ചാട്ടത്തിന് സമീപം പാറപ്പൊത്തില്‍ നിന്ന് കണ്ടെത്തിയത്. മൂന്നു കുട്ടികള്‍ ഇപ്പോള്‍ വനംവകുപ്പിന്റെ ക്യാംപ് ഷെഡിലാണ്.

മാതാവിനെ വനത്തില്‍ കണ്ടതോടെയാണ് കുടംബം ഒറ്റപ്പെട്ട വിവരമറിയുന്നത്. തുടര്‍ന്ന് നടത്തിയ പരിശോധനയില്‍ കുട്ടികളെ വെള്ളച്ചാട്ടത്തിന് സമീപത്ത് നിന്ന് കണ്ടെത്തുകയായിരുന്നു. രാവിലെ പത്ത് മണിയോടെ ഏറാട്ടുകുണ്ട് കോളനിയിലേക്കുള്ള യാത്രക്കിടെയാണ് അമ്മയേയും ഒരു കുട്ടിയെയും ഒറ്റപ്പെട്ട നിലയില്‍ കണ്ടത്.

ഭക്ഷണം കിട്ടാതെ അവശനിലയിലായിരുന്നു ഇവര്‍. ഉടന്‍ ഇവരെ അട്ടമല ഭാഗത്തെ എസ്റ്റേറ്റില്‍ താമസിപ്പിച്ചു. ഉരുള്‍പൊട്ടലും കനത്തമഴയും കാരണം വഴിയെല്ലാം അടഞ്ഞുകിടക്കുകയായിരുന്നു. നാലുമണിക്കൂറെടുത്താണ് വനംവകുപ്പ് ഉദ്യോഗസ്ഥര്‍ ഇവിടെ എത്തിച്ചേര്‍ന്നത്.