ന്യൂഡല്‍ഹി: ഈ വര്‍ഷത്തെ ഹജ്ജ് തീര്‍ത്ഥാടനത്തിനായി കരിപ്പൂര്‍ എംബാര്‍ക്കേഷന്‍ പോയിന്റ് വഴി പുറപ്പെടുന്നവരില്‍ നിന്ന് ഉയര്‍ന്ന വിമാനക്കൂലി ഈടാക്കാനുള്ള എയര്‍ ഇന്ത്യയുടെ നീക്കം തടയണമെന്നാവശ്യപ്പെട്ട് കേന്ദ്രസര്‍ക്കാരിനെ സമീപിച്ച് മുസ്ലിംലീഗ് എം.പി ഇ.ടി മുഹമ്മദ് ബഷീര്‍. ഹജ്ജിന്റെ ചുമതലയുള്ള കേന്ദ്ര ന്യൂനപക്ഷ, പാര്‍ലമെന്ററി വകുപ്പ് മന്ത്രി കിരണ്‍ റിജിജുവിനെ നേരില്‍ കണ്ടാണ് കരിപ്പൂര്‍ അന്താരാഷ്ട്ര വിമാനതാവളത്തിന്റെ അഡ്വൈസറി കമ്മിറ്റി ചെയര്‍മാന്‍ കൂടിയായ ഇ.ടി മുഹമ്മദ് ബഷീര്‍ എം.പി ഇക്കാര്യം ആവശ്യപ്പെട്ടത്. 

എയര്‍ ഇന്ത്യ തന്നെ സര്‍വീസ് നടത്തുന്ന കണ്ണൂരില്‍ 87,000 രൂപയും സൗദിയ സര്‍വീസ് നടത്തുന്ന കൊച്ചിയില്‍ 86,000 രൂപയും ഈടാക്കുമ്പോഴാണ് കരിപ്പൂരില്‍ നിന്ന് എയര്‍ ഇന്ത്യ എക്‌സ്പ്രസ് 1,25,000 രൂപ വിമാനക്കൂലിയായി ഈടാക്കാന്‍ ശ്രമിക്കുന്നത്. ഈ വിവേചനത്തിനെതിരെ അടിയന്തര നടപടി വേണമെന്നും സംസ്ഥാനത്തെ മൂന്ന് എംബാര്‍ക്കേഷന്‍ പോയിന്റുകളിലും നിരക്ക് ഏകീകരിക്കണമെന്നും എം.പി ആവശ്യപ്പെട്ടു. 

ഹാജിമാരോട് നീതിയുക്തമായി ഇടപെടാന്‍ അടിയന്തര നിര്‍ദ്ദേശം നല്‍കേണ്ടതുണ്ടെന്നും ആവശ്യപ്പെട്ടു. വിഷയത്തില്‍ ഇടപെടുമെന്ന് മന്ത്രി ഉറപ്പ് നല്‍കി. ബന്ധപ്പെട്ടവരുമായി സംസാരിച്ച് തീരുമാനത്തിലെത്താന്‍ കഴിയുമെന്ന് പ്രത്യാശ പ്രകടിപ്പിച്ചു. വിമാന കമ്പനി അധികൃതര്‍, കേന്ദ്ര ഹജ്ജ് കമ്മിറ്റി എന്നിവരുമായി സംസാരിച്ച് ഉചിതമായ തീരുമാനം എടുക്കുമെന്നും മന്ത്രി വ്യക്തമാക്കി.

Muslim League MP ET Muhammad Basheer has approached the central government, demanding that it stop Air India's move to charge higher airfares from those departing via the Karipur embarkation point for this year's Hajj pilgrimage.