പാമ്പുകളെ എല്ലാവര്‍ക്കും ഭയമാണ്. എന്നാല്‍ വലിയ പെരുമ്പാമ്പ് ആണെങ്കിലോ? കണ്ടാല്‍ തന്നെ ഭയക്കും. എത്ര വലിയ ഇരകളെയും പെട്ടെന്നു തന്നെ കീഴ്‌പെടുത്തി വിഴുങ്ങുന്ന ഭീകരന്‍മാരാണ് പെരുമ്പാമ്പുകള്‍. കഴിഞ്ഞ ദിവസം രാജസ്ഥാനില്‍ നിന്ന് റിപോര്‍ട്ട് ചെയ്ത ഒരു സംഭവമാണിത്. ഒരു പശുക്കുട്ടിയെ പെരുമ്പാമ്പ് മുഴുവനായും വിഴുങ്ങുകയാണ്. കുറച്ച് കഴിഞ്ഞ് പാമ്പ് അതിനെ പുറത്തേക്ക് ഛര്‍ദ്ദിക്കുകയും ചെയ്യുന്നു.

പക്ഷേ, പശുക്കിടാവിന്റെ ജീവന്‍ അപ്പോഴേക്കും നഷ്ടമായിരുന്നു. മരിച്ചുകിടക്കുന്ന പശുക്കുട്ടിയുടെ അടുത്ത് നിന്ന് കണ്ണീരോടെ മാറാതെ നില്‍ക്കുകയാണ് തള്ളപ്പശു. എന്തായിരിക്കും പശുക്കുട്ടിയുടെ അടുത്ത് തള്ളപ്പശു ഇങ്ങനെ നില്‍ക്കുന്നത് എന്ന് വീട്ടുടമസ്ഥര്‍ ചെന്നു നോക്കിയപ്പോഴാണ് പശുക്കുട്ടിയെ പെരുമ്പാമ്പ് പിടിച്ചതാണെന്ന് മനസിലായത്. 

രാജസ്ഥാനിലെ രാജ്‌സമന്ദ് മേവാര്‍ ജില്ലയിലെ അമേത് പട്ടണത്തിലാണ് സംഭവം നടന്നത്. ഇവിടുത്തെ ഗ്രാമീണര്‍ ഭീതിയോടെയാണ് ഇവിടെ കഴിയുന്നത്. കാരണം കുറച്ചു ദിവസമായി ഗ്രാമങ്ങളില്‍ കണ്ടെത്തിയത് അഞ്ചിലധികം പെരുമ്പാമ്പുകളെയാണ്. നിരവധി കന്നുകാലികളെ പാമ്പുകള്‍ തിന്നിരുന്നു.

ഇതുവരെ മനുഷ്യരെയൊന്നും ആക്രമിച്ചിട്ടില്ലെങ്കിലും പാമ്പിനെ പിടികൂടാന്‍ വരാത്ത വനംവകുപ്പിന്റെ അനാസ്ഥയ്‌ക്കെതിരേ വലിയ പ്രതിഷേധമാണ് ഇവിടെ. കുറച്ചു ദിവസം മുമ്പ് രാത്രി പെരുമ്പാമ്പ് കൂട്ടില്‍ കെട്ടിയിട്ടിരുന്ന പശുക്കുട്ടിയെ മുഴുവനായും വിഴുങ്ങുകയായിരുന്നു. 

പക്ഷേ പശുക്കുട്ടിയുടെ വലുപ്പം കാരണം ദഹിക്കാതെ വന്നതോടെ പാമ്പ് അതിനെ ഛര്‍ദ്ദിച്ചു പുറന്തള്ളുകയും ചെയ്തു. തന്റെ കുഞ്ഞിന്റെ അടുത്തുനിന്നു മാറാതെ നില്‍ക്കുന്ന തള്ളപ്പശുവിന്റെ കണ്ണീരോടെയുള്ള നില്‍പ്പ് സങ്കടത്തോടെയാണ് പ്രദേശവാസികള്‍ കണ്ടത്. പാമ്പിനെ കണ്ടയിടങ്ങളില്‍ കെണികള്‍ വച്ച് പിടികൂടണമെന്നാണ് നാട്ടുകാര്‍ വനംവകുപ്പ് ഉദ്യോഗസ്ഥരോട് ആവശ്യപ്പെടുന്നത്.