അബൂദബി: ആംബുലന്‍സുകള്‍ അടക്കമുള്ള അടിയന്തിര വാഹനങ്ങള്‍ക്ക് വഴിയൊരുക്കേണ്ടതിന്റെ പ്രാധാന്യത്തെ മുന്‍നിര്‍ത്തി 'ഗിവിംഗ് വേ റ്റു മെര്‍ജന്‍സി വെഹിക്കിള്‍' ക്യാമ്പയിന് തുടക്കമിട്ട് അബൂദബി സിവില്‍ ഡിഫന്‍സ് അതോറിറ്റി (എഡിസിഡിഎ).

അബൂദബിയിലെ ജോയിന്റ് ട്രാഫിക് സേഫ്റ്റി കമ്മിറ്റിയുടെ മാര്‍ഗനിര്‍ദേശപ്രകാരം അബൂദബി പൊലിസ് ജനറല്‍ ഹെഡ്ക്വാര്‍ട്ടേഴ്‌സുമായും ഇന്റഗ്രേറ്റഡ് ട്രാന്‍സ്‌പോര്‍ട്ട് സെന്റര്‍ പ്രതിനിധീകരിക്കുന്ന മുനിസിപ്പാലിറ്റികളുടെയും ഗതാഗത വകുപ്പിന്റെയും സഹകരണത്തോടെയാണ് ക്യാമ്പയിന്‍ ആരംഭിച്ചിരിക്കുന്നത്.

അടിയന്തര വാഹനങ്ങള്‍ക്ക് വഴിയൊരുക്കുന്നതിന്റെ പ്രാധാന്യത്തെക്കുറിച്ച് പൊതുജന അവബോധം വളര്‍ത്തുന്നതിനും ജീവന്‍ രക്ഷിക്കുന്നതിനും സ്വത്ത് സംരക്ഷിക്കുന്നതിനും അപകട ദൃശ്യങ്ങള്‍ വേഗത്തില്‍ കണ്ടെത്തുന്നതിനുമാണ് ഈ ക്യാമ്പയിന്‍ രൂപകല്‍പ്പന ചെയ്തിരിക്കുന്നത്. റോഡ് സുരക്ഷയും പൊതുജന സഹകരണവും മെച്ചപ്പെടുത്തുക എന്ന സര്‍ക്കാരിന്റെ ലക്ഷ്യത്തെ മുന്‍നിര്‍ത്തിയാണ് ക്യാമ്പയിന്‍ നടപ്പാക്കുന്നത്.

ആംബുലന്‍സുകള്‍, ഫയര്‍ ട്രക്കുകള്‍, പൊലിസ് കാറുകള്‍ തുടങ്ങിയ അടിയന്തര വാഹനങ്ങള്‍ക്ക് തടസ്സമില്ലാതെ കടന്നുപോകാന്‍ അനുവദിക്കുന്നത് പ്രതികരണ സമയം കുറയ്ക്കുന്നതിനും അതിജീവന നിരക്ക് മെച്ചപ്പെടുത്തുന്നതിനും നിര്‍ണായകമാണെന്ന് അബൂദബി പൊലിസ് വ്യക്തമാക്കി. ജീവന് ഭീഷണിയുള്ള സാഹചര്യങ്ങളില്‍, പ്രത്യേകിച്ച് തീപിടുത്തങ്ങള്‍ അല്ലെങ്കില്‍ ഗുരുതരമായ ആശുപത്രി കേസുകള്‍ പോലുള്ള അടിയന്തര സാഹചര്യങ്ങളില്‍ ഓരോ നിമിഷവും പ്രധാനമാണ്. 

അപകടങ്ങളിലും തീപിടുത്തങ്ങളിലും ഉണ്ടാകുന്ന നാശനഷ്ടങ്ങള്‍ കുറയ്ക്കുന്നതിന് വേഗത്തിലുള്ള അടിയന്തര പ്രതികരണങ്ങള്‍ ആവശ്യമാണെന്ന് അബൂദബി പൊലിസ് ഊന്നിപ്പറഞ്ഞു. സൈറണുകള്‍ കേള്‍ക്കുമ്പോഴോ അടിയന്തര വാഹനങ്ങള്‍ കാണുമ്പോഴോ വാഹനമോടിക്കുന്നവര്‍ ഉടനടി മാറിക്കൊടുക്കണം. ഇത് പൊതു സുരക്ഷയ്ക്കുള്ള കൂട്ടായ പ്രതിബദ്ധതയുടെ ഭാഗമാണ്. 

ട്രാഫിക് നിയമങ്ങളെക്കുറിച്ച് ഡ്രൈവര്‍മാരെ ബോധവല്‍ക്കരിക്കുക, ഉത്തരവാദിത്തമുള്ള പെരുമാറ്റം പ്രോത്സാഹിപ്പിക്കുക, അടിയന്തര സംഘങ്ങളുടെ വേഗത്തിലുള്ള ഗതാഗതം ഉറപ്പാക്കുക എന്നിവയാണ് ക്യാമ്പയിന്‍ കൊണ്ട് ലക്ഷ്യമിടുന്നതെന്ന് ഇന്റഗ്രേറ്റഡ് ട്രാന്‍സ്‌പോര്‍ട്ട് സെന്റര്‍ പറഞ്ഞു. കൂടാതെ സാമൂഹിക ഉത്തരവാദിത്തം വളര്‍ത്തിയെടുക്കുക, അടിയന്തര സേവനങ്ങളില്‍ വിശ്വാസം വളര്‍ത്തുക, ആത്യന്തികമായി എല്ലാവരുടെയും റോഡ് സുരക്ഷയും ജീവിത നിലവാരവും മെച്ചപ്പെടുത്തുക എന്നിവയും ഇതിന്റെ ലക്ഷ്യങ്ങളാണ്.

Abu Dhabi launches new campaign, Giving Way to Emergency Vehicles