വാഷിംങ്ടണ്‍: പകരച്ചുങ്കത്തില്‍ ചൈനയുമായുള്ള പോര് കടുപ്പിച്ച് അമേരിക്കന്‍ ഭരണകൂടം. ചൈനീസ് ഉല്പ്പന്നങ്ങള്‍ക്കുള്ള ഇറക്കുമതി തീരുവ 245 ശതമാനം വരെയാക്കി വര്‍ധിപ്പിച്ചു. ഇത് വരും ദിവസങ്ങളില്‍ അമേരിക്കയും ചൈനയും തമ്മിലുള്ള വ്യാപാര സംഘര്‍ഷം രൂക്ഷമാക്കും. ചൈനയുടെ സമീപകാല കയറ്റുമതി നിയന്ത്രണങ്ങള്‍ക്കും പ്രതികാര താരിഫുകള്‍ക്കും മറുപടിയായാണ് അമേരിക്കന്‍ പ്രഖ്യാപനം.

സൈനിക, ബഹിരാകാശ, സെമികണ്ടക്ടര്‍ വ്യവസായങ്ങള്‍ക്ക് നിര്‍ണായകമായ ഘടകങ്ങളായ ഗാലിയം, ജെര്‍മേനിയം, ആന്റിമണി എന്നിവയുള്‍പ്പെടെയുള്ള സുപ്രധാന ഹൈടെക് വസ്തുക്കള്‍ക്ക് ചൈന മനഃപൂര്‍വ്വം നിയന്ത്രണം ഏര്‍പ്പെടുത്തിയതായി അമേരിക്കന്‍ ഭരണകൂടം ആരോപിച്ചു. അടുത്തിടെ, ആറ് ഹെവി റെയര്‍ എര്‍ത്ത് ലോഹങ്ങളുടെയും റെയര്‍ എര്‍ത്ത് ലോഹങ്ങളുടെയും കയറ്റുമതി ചൈന താല്‍ക്കാലികമായി നിര്‍ത്തിവച്ചിരുന്നു. 

'കുറച്ച് മാസങ്ങള്‍ക്ക് മുമ്പ്, ചൈന അമേരിക്കയിലേക്കുള്ള ഗാലിയം, ജെര്‍മേനിയം, ആന്റിമണി, സൈനിക ആവശ്യങ്ങള്‍ക്കായി ഉപയോഗിക്കുന്ന മറ്റ് പ്രധാന ഹൈടെക് വസ്തുക്കള്‍ എന്നിവയുടെ കയറ്റുമതി നിര്‍ത്തിവച്ചു, ലോകമെമ്പാടുമുള്ള വാഹന നിര്‍മ്മാതാക്കള്‍, എയ്റോസ്പേസ് നിര്‍മ്മാതാക്കള്‍, സെമികണ്ടക്ടര്‍ കമ്പനികള്‍, സൈനിക കരാറുകാര്‍ എന്നിവരുടെ കേന്ദ്ര ഘടകങ്ങളുടെ വിതരണം തടസ്സപ്പെടുത്തുന്നതിനായി, ആറ് ഹെവി അപൂര്‍വ എര്‍ത്ത് ലോഹങ്ങളുടെയും അപൂര്‍വ എര്‍ത്ത് ലോഹങ്ങളുടെയും കയറ്റുമതി ഈ ആഴ്ചയാണ് ചൈന നിര്‍ത്തിവച്ചത്.' വൈറ്റ് ഹൗസ് പ്രസ്താവനയില്‍ പറഞ്ഞു.

കഴിഞ്ഞ വെള്ളിയാഴ്ച ചൈന യുഎസ് ഉല്‍പ്പന്നങ്ങള്‍ക്കുള്ള തീരുവ 125% ആയി ഉയര്‍ത്തിയിരുന്നു. അമേരിക്കന്‍ പ്രസിഡന്റ് ട്രംപ് ചൈനീസ് ഇറക്കുമതിയുടെ തീരുവ 145% ആയി വര്‍ധിപ്പിച്ചതിന് തൊട്ടുപിന്നാലെയായിരുന്നു ഈ നീക്കം. അതേസമയം മറ്റ് രാജ്യങ്ങളില്‍ നിന്നുള്ള ഉല്‍പ്പന്നങ്ങള്‍ക്കുള്ള അധികതീരുവ 90 ദിവസത്തേക്ക് താല്‍ക്കാലികമായി നിര്‍ത്തിവച്ചിരുന്നു.

'പുതിയ വ്യാപാര കരാറുകളെക്കുറിച്ച് ചര്‍ച്ച ചെയ്യാന്‍ 75-ലധികം രാജ്യങ്ങള്‍ ഇതിനകം സന്നദ്ധത പ്രകടിപ്പിച്ചിട്ടുണ്ട്,' വൈറ്റ് ഹൗസ് പറഞ്ഞു. 

തീരുവ ബാധിക്കുന്ന ഉല്‍പ്പന്നങ്ങളുടെ കൃത്യമായ പട്ടിക വെളിപ്പെടുത്തിയിട്ടില്ലെങ്കിലും ഈ വര്‍ധനവ് ഉപഭോക്തൃ, വ്യാവസായിക ഉല്‍പ്പന്നങ്ങളുടെ വിലയെ ബാധിക്കുമെന്ന് വിശകലന വിദഗ്ധര്‍ അഭിപ്രായപ്പെട്ടു.