കൊച്ചി:  കെ.എസ്.ഇ.ബി ജീവനക്കാരുടെ പെൻഷൻ പ്രായം വർധിപ്പിക്കുന്നതു സംബന്ധിച്ച ശുപാർശയിൽ സർക്കാർ അടിയന്തരമായി തീരുമാനമെടുക്കണമെന്ന് ഹൈക്കോടതി. അല്ലാത്തപക്ഷം, ധനവകുപ്പ് അഡീഷണൽ ചീഫ് സെക്രട്ടറി ജൂൺ മൂന്നിന് കോടതിയിൽ നേരിട്ട് ഹാജരാകണമെന്ന് ജസ്റ്റിസ് ഡി.കെ. സിംഗ് ഉത്തരവിട്ടു.

കേരള പവർ ബോർഡ് ഓഫിസേഴ്സ് ഫെഡറേഷനും കെ.എസ്.ഇ.ബിയിലെ ഒരു കൂട്ടം ജീവനക്കാരും സമർപ്പിച്ച ഹരജിയിലാണ് ഈ നിർദേശം. കെ.എസ്.ഇ.ബി, വാട്ടർ അതോറിറ്റി തുടങ്ങിയ സ്ഥാപനങ്ങളിലെ സേവന-വേതന പരിഷ്കരണം പഠിക്കാൻ 2023ൽ സർക്കാർ 'റിയാബ്' പ്രസിഡന്റിന്റെ നേതൃത്വത്തിൽ വിദഗ്ധ സമിതി രൂപീകരിച്ചിരുന്നു. വൈദ്യുതി ബോർഡിൽ വിരമിക്കൽ പ്രായം 56ൽ നിന്ന് 58 ആയി ഉയർത്തണമെന്ന ശുപാർശ കെ.എസ്.ഇ.ബി സമിതിക്ക് നൽകിയിരുന്നു. എന്നാൽ, സമിതിയുടെ തീരുമാനം വൈകുന്നതിനാൽ, മേയ് 31ന് വിരമിക്കേണ്ട ജീവനക്കാർ ഉൾപ്പെടെയുള്ളവർ ഹൈക്കോടതിയെ സമീപിക്കുകയായിരുന്നു.