വിറ്റാമിന്‍സിയും ആന്റിഓക്‌സിഡന്റുകളും ധാരാളം അടങ്ങിയിട്ടുണ്ട് ഓറഞ്ചിലും അതിന്റെ തൊലിയിലുമൊക്കെ. ഇത് ചര്‍മത്തിന് വളരെയധികം നല്ലതാണ്. നിറം വര്‍ധിപ്പിക്കുകയും തിളക്കമുള്ളതാക്കുകയും ചെയ്യുന്നു. അതിനായി ഇത് എങ്ങനെയൊക്കെ ഉപയോഗിക്കാമെന്നു നോക്കാം.

ആന്റി ഇന്റഫഌമേറ്ററി ഗുണങ്ങളുളള ഓറഞ്ചുതൊലി നിങ്ങളുടെ ചര്‍മത്തെ ആഴത്തില്‍ ജലാംശവും പോഷണവും നല്‍കുന്നു. അതിനാല്‍ ചര്‍മം ആരോഗ്യവും തിളക്കമുള്ളതുമാക്കി നിലനിര്‍ത്താന്‍ സഹായിക്കുന്നു.

പാല്‍

ഓറഞ്ചിന്റെ തൊലി നന്നായി ഉണക്കിപ്പൊടിച്ചെടുക്കുക. ഈ പൊടി കുറച്ച് പാലില്‍ കലര്‍ത്തി പേസ്റ്റ് രൂപത്തില്‍ തയാറാക്കുക. ശേഷം ഇതു മുഖത്ത് പുരട്ടുക. 20 മിനിറ്റ് കഴിഞ്ഞാല്‍ കഴുകിക്കളയാവുന്നതാണ്. ഇത് ചര്‍മത്തിന് മുറുക്കം നല്‍കുകയും സ്വാഭാവികമായ തിളക്കം നല്‍കുകയും ചെയ്യുന്നു. 

 
തേന്‍

ഒരു ചെറിയ ബൗളില്‍ കുറച്ച് ഓറഞ്ചിന്റെ തൊലി പൊടിച്ചതെടുത്ത് അതിലേക്ക് ആവശ്യമുള്ളത്ര തേനും ചേര്‍ത്ത് നന്നായി മിക്‌സ് ചെയ്യുക. പേസ്റ്റ് രൂപത്തിലായ ഈ മിക്‌സ് നന്നായി മുഖത്ത് പുരട്ടി വയ്ക്കുക. 15 മിനിറ്റിനു ശേഷം കഴുകാവുന്നതാണ്. ഇത് ചര്‍മത്തിന് ഈര്‍പ്പം നല്‍കുകയും ചര്‍മത്തിലെ മൃതകോശങ്ങള്‍ നീക്കം ചെയ്ത് തിളക്കം വര്‍ധിപ്പിക്കുകയും ചെയ്യുന്നതാണ്. 

തൈര്
ഒരു ടേബിള്‍ സ്പൂണ്‍ തൈരിലേക്ക് ആവശ്യാനുസരണം ഓറഞ്ച് തൊലി പൊടിയും ചേര്‍ത്ത് മിക്‌സ് ചെയ്ത് പേസ്റ്റ് ഉണ്ടാക്കുക. ഇത് മുഖത്തും കഴുത്തിലും പുരട്ടാവുന്നതാണ്. ഇത് ചര്‍മത്തിന് ഈര്‍പ്പം നല്‍കുകയും മുഖത്തിന് തിളക്കം നല്‍കുകയും ചെയ്യുന്നു. 

ടോണര്‍

ഒരു പാത്രത്തില്‍ കുറച്ച് വെള്ളമൊഴിച്ച് അടുപ്പത്ത് വച്ച് തിളപ്പിച്ച് അതിലേക്ക് ഓറഞ്ച് തൊലിയുടെ പൊടി ഇട്ട് കൊടുക്കുക. നന്നായി തിളച്ചതിനു ശേഷം തണുത്ത് കഴിഞ്ഞാല്‍ കുപ്പിയിലേക്ക് ഒഴിച്ചു വയ്ക്കുക. ഇത് ടോണറായി മുഖത്തിടാവുന്നതാണ്. ഇതും ചര്‍മത്തിനു തിളക്കം നല്‍കുന്നു. 

റോസ് വാട്ടര്‍

റോസ് വാട്ടറില്‍ ഓറഞ്ച് പൊടിയിട്ട് മുഖത്ത് പുരട്ടുന്നതും നല്ലതാണ്. ഇത് മുഖത്തെ തണുപ്പിക്കുകയും മൃദുവാക്കുകയും ചെയ്യുന്നു.

മഞ്ഞള്‍

ഓറഞ്ചിന്റെ പൊടിയും മഞ്ഞള്‍പൊടിയും കുറച്ച് പാലും ചേര്‍ത്ത് നന്നായി മിക്‌സ് ചെയ്യുക. മുഖത്ത് പുരട്ടി 20 മിനിറ്റിനുശേഷം കഴുകാവുന്നതാണ്. ഇതും മുഖത്തെ പാടുകള്‍ ഇല്ലാതാക്കി ചര്‍മത്തിനു തിളക്കം നല്‍കുന്നതാണ്.