ആലുവ: ഇന്നലെ രാത്രി മുതല്‍ എറണാകുളത്തെ തിരുവാങ്കുളത്ത് നിന്നും കാണാതായ മൂന്നു വയസ്സുകാരിയെ മരിച്ച നിലയില്‍ കണ്ടെത്തി. മറ്റക്കുഴി കിഴിപ്പിള്ളില്‍ സുഭാഷിന്റെ മകള്‍ മൂന്നുവയസ്സുകാരിയായ കല്യാണിയുടെ മൃതദേഹമാണ് കണ്ടെത്തിയത്. 

ഇന്നു പുലര്‍ച്ചെ രണ്ടരയോടെയാണ് നീന്തല്‍സംഘം ചാലക്കുടി പുഴയില്‍ നിന്നും മൃതദേഹം കണ്ടെത്തിയത്. എട്ടരമണിക്കൂര്‍ നീണ്ട തിരച്ചിലിനൊടുവിലാണ് കുട്ടിയുടെ മൃതദേഹം ലഭിച്ചത്. മൂഴിക്കുളം പാലത്തിനടിയിലെ മൂന്നാമത്തെ പാലത്തിനു സപീപത്തു വച്ചാണ് മൃതദേഹം കണ്ടെത്തിയത്. മൃതദേഹം ആശുപത്രിയിലേക്ക് മാറ്റിയിട്ടുണ്ട്. പൊലിസ് കസ്റ്റഡിയിലുള്ള അമ്മ സന്ധ്യയുടെ അറസ്റ്റ് ഇന്ന് രേഖപ്പെടുത്തിയേക്കും.

സന്ധ്യയോടൊപ്പം കുട്ടി അങ്കണവാടിയില്‍ നിന്ന് വീട്ടിലേക്ക് മടങ്ങിയിരുന്നു. ആലുവയിലെ സന്ധ്യയുടെ വീട്ടിലേക്കാണ് ഇരുവരും യാത്ര തിരിച്ചത്. തിരുവാങ്കുളം വരെ സന്ധ്യയും കുട്ടിയും ഓട്ടോയിലാണ് യാത്ര ചെയ്തത്. ഇവിടെ നിന്നും ആലുവ വരെ ബസിലാണ് യാത്ര ചെയ്തതെന്നും ഈ സമയം കുട്ടി കൂടെ ഉണ്ടായിരുന്നതായും സന്ധ്യ പറഞ്ഞിരുന്നു. എന്നാല്‍ ഇതിനു ശേഷമാണ് കുട്ടിയെ മൂഴിക്കുളം പാലത്തിനടുത്ത് വച്ച് കാണാതായ വിവരം  സന്ധ്യ വെളിപ്പെടുത്തിയത്. തുടര്‍ന്നാണ് പൊലിസും സ്‌കൂബ ടീമും തിരച്ചില്‍ ഊര്‍ജിതമാക്കിയത്. ഇവര്‍ക്ക് മാനസിക പ്രശ്‌നങ്ങള്‍ ഉള്ളതായി കുടുംബത്തിന്റെ മൊഴിയുണ്ട്.