വോൾവോയുടെ പുതിയ ഇലക്ട്രിക് എസ്‌യുവി EX90-ന്റെ LiDAR സുരക്ഷാ സംവിധാനം സ്മാർട്ട്‌ഫോൺ ക്യാമറകൾക്ക് കേടുപാടുകൾ വരുത്തുമെന്ന് റിപ്പോർട്ട്. ഈ വാഹനത്തിലെ LiDAR-ൽ ഉപയോഗിക്കുന്ന പൾസ്ഡ് ലേസറുകൾ ക്യാമറ സെൻസറുകളെ ശാശ്വതമായി തകരാറിലാക്കിയേക്കാമെന്നാണ് കണ്ടെത്തൽ. ഒരു റെഡ്ഡിറ്റ് ഉപയോക്താവ് EX90-ന്റെ LiDAR മൊഡ്യൂൾ ചിത്രീകരിക്കവെ തന്റെ ഫോണിന്റെ ടെലിഫോട്ടോ ക്യാമറ തകർന്നതായി വെളിപ്പെടുത്തി. സൂം ചെയ്തപ്പോൾ ലേസർ ബീമുകൾ സെൻസറിലെ പിക്സലുകളെ നശിപ്പിച്ചു, എന്നാൽ വൈഡ്-ആംഗിൾ ക്യാമറയിൽ പ്രശ്നമുണ്ടായില്ല.

 

 

ഈ പ്രശ്നം വോൾവോ EX90-ന് മാത്രമല്ല, പോൾസ്റ്റാർ 3, മെഴ്‌സിഡസ് എസ്-ക്ലാസ്, ബിഎംഡബ്ല്യു ഐ7, ഫോക്‌സ്‌വാഗൻ ഐഡി ബസ് തുടങ്ങിയ LiDAR ഉപയോഗിക്കുന്ന മറ്റ് വാഹനങ്ങളെയും ബാധിക്കുന്നു. LiDAR സാങ്കേതികവിദ്യ ലേസർ ഉപയോഗിച്ച് റോഡും ചുറ്റുപാടുകളും സ്കാൻ ചെയ്യുകയും തടസ്സങ്ങളെക്കുറിച്ച് കൃത്യമായ വിവരങ്ങൾ നൽകുകയും ചെയ്യുന്നു. എന്നാൽ, "കണ്ണിന് സുരക്ഷിതം" എന്ന് വിശേഷിപ്പിക്കപ്പെടുന്ന ഈ ലേസറുകൾ ക്യാമറ സെൻസറുകൾക്ക് ഹാനികരമാണ്. വോൾവോ ഇതേക്കുറിച്ച് മുന്നറിയിപ്പ് നൽകിയിട്ടുണ്ട്.

ടെലിഫോട്ടോ ലെൻസ് ഉപയോഗിച്ച് LiDAR-ലേക്ക് നേരിട്ട് സൂം ചെയ്യുന്നത് ഒഴിവാക്കണമെന്നാണ് വിദഗ്ധർ നിർദേശിക്കുന്നത്. വൈഡ്-ആംഗിൾ ക്യാമറകൾക്ക് കേടുപാടിന്റെ സാധ്യത കുറവാണ്, എന്നാൽ അടുത്ത് നിന്ന് ചിത്രീകരണം ഒഴിവാക്കുന്നതാണ് നല്ലത്. വോൾവോ അമേരിക്കയിൽ 4 ലക്ഷം വാഹനങ്ങൾ റിയർവ്യൂ ക്യാമറ പ്രശ്നത്തിന് തിരിച്ചുവിളിച്ച സാഹചര്യത്തിൽ, ഈ വിവാദം കമ്പനിക്ക് വെല്ലുവിളിയാകുന്നു. LiDAR ഉള്ള വാഹനങ്ങൾ ചിത്രീകരിക്കുമ്പോൾ ജാഗ്രത പാലിക്കണമെന്ന് ഉപഭോക്താക്കളോട് അഭ്യർത്ഥിക്കുന്നു.