കൊല്ലം: നഗരത്തിലെ ഹോട്ടലുകളിലും പഴം-പച്ചക്കറികടകളിലും മത്സ്യമാര്‍ക്കറ്റുകളിലും വിജിലന്‍സ് റെയ്ഡ്. മായം കലര്‍ത്തിയ ഭക്ഷ്യവസ്തുക്കളും മറ്റും കണ്ടെടുത്തു.
പരിശോധനയെതുടര്‍ന്ന് മൂന്ന് ഹോട്ടലുകള്‍ അടപ്പിക്കുകയും നിരവധി വ്യാപാര സ്ഥാപനങ്ങള്‍ക്കെതിരേ നടപടി എടുക്കുകയും ചെയ്തു. ജില്ലാമെഡിക്കല്‍ ഓഫീസ്, ഭക്ഷ്യസുരക്ഷാ വിഭാഗം, ലീഗല്‍ മെട്രോളജി തുടങ്ങിയ വകുപ്പധികൃതരും പരിശോധനയില്‍ പങ്കെടുത്തു.
തദ്ദേശ സ്വയംഭരണ സ്ഥാപനങ്ങളിലെ ആരോഗ്യവകുപ്പ് വിഭാഗം ഇത്തരം പരിശോധന നടത്താന്‍ മടിക്കുന്നുവെന്ന പരാതിയെതുടര്‍ന്ന് വിജിലന്‍സ് സതേണ്‍ റേഞ്ച് എസ്പി ഇ.കെ സാബുവിന്റെ നിര്‍ദേശപ്രകാരമാണ് ഡി.വൈ.എസ്.പി എന്‍.ജീജിയുടെ നേതൃത്വത്തില്‍ പരിശോധന നടത്തിയത്.
കെ.എസ.്ആര്‍.ടി.സി ബസ് സ്റ്റാന്‍ഡിലെ കാന്റീന്‍ ആണ് വൃത്തിഹീനമായ ഭക്ഷണം കണ്ടെത്തിയതിനെതുടര്‍ന്ന് അടപ്പിച്ചത്. റെയില്‍വേ സ്റ്റേഷന് സമീപത്തെ എസ്.ബി.ഐക്ക് അടുത്തുള്ള ഹോട്ടലിന് നോട്ടീസ് നല്‍കി.
പായിക്കട, കടപ്പാക്കട, ചാമക്കട എന്നിവിടങ്ങളിലെ മത്സ്യമാര്‍ക്കറ്റുകളില്‍ വില്‍പനയ്ക്ക് വച്ച ചീഞ്ഞളിഞ്ഞ മത്സ്യങ്ങള്‍ പരിശോധനാസംഘം കണ്ടെടുത്തു. ഓടയുടെ മുകളില്‍ വില്‍പനയ്ക്കായി സൂക്ഷിച്ചിരുന്ന മത്സ്യവും പിടിച്ചെടുത്തിട്ടുണ്ട്. പഴം പച്ചക്കറി വ്യാപാര സ്ഥാപനങ്ങളില്‍ നടത്തിയ പരിശോധനയിലും ഭക്ഷ്യയോഗ്യമല്ലാത്ത സാധനങ്ങള്‍ കണ്ടെടുത്തു. ആപ്പിളില്‍ മാരകമായ മെഴുക് പുരട്ടിയതായും മുന്തിരിയില്‍ രാസ വസ്തു സ്‌പ്രേ ചെയ്തതായും കണ്ടെത്തി. ഇവയുടെ സാമ്പിള്‍ ശേഖരിച്ച് തിരുവനന്തപുരത്ത് പരിശോധനക്കായി അയച്ചിട്ടുണ്ടെന്ന് വിജിലന്‍സ് അധികൃതര്‍ പറഞ്ഞു.ത്രാസുകളില്‍ ക്രമക്കേട് കാട്ടിയ ഏതാനും വ്യാപാരസ്ഥാപനങ്ങള്‍ക്കെതിരേയും നടപടിയെടുത്തു.