വാഷിങ്ടണ്‍: പ്രസിഡന്റ് ഡൊണാള്‍ഡ് ട്രംപിന്റെ വിശ്വസ്തനും വൈറ്റ് ഹൗസിലെ പേഴ്‌സനല്‍ ഡയറക്ടറുമായ സെര്‍ജിയോ ഗോര്‍ ഇന്ത്യയിലേക്കുള്ള യു.എസിന്റെ പുതിയ അംബാസഡര്‍. ദക്ഷിണ മധ്യേഷ്യയിലെ പ്രത്യേക പ്രതിനിധിയുടെ ചുമതലയും സെര്‍ജിയോ ഗോര്‍ വഹിക്കുമെന്ന് സ്വന്തം സമൂഹമാധ്യമ അക്കൗണ്ടായ ട്രൂത്ത് സോഷ്യലിലൂടെ ട്രംപ് അറിയിച്ചു. നാലായിരത്തോളം ഫെഡറല്‍ ഗവണ്‍മെന്റ് ഉദ്യോഗസ്ഥരെ നിയമിച്ച് വിവിധ വകുപ്പുകളിലെയും ഏജന്‍സികളിലെയും 95 ശതമാനം ഒഴിവുകളും നികത്തിയിട്ടുയതായും യു.എസ് പ്രസിഡന്റ് പറഞ്ഞു.

ട്രംപ് ഏര്‍പ്പെടുത്തിയ അധിക താരിഫിനെ തുടര്‍ന്ന് യു.എസുമായുള്ള ഇന്ത്യയുടെ ബന്ധത്തില്‍ വിള്ളല്‍വീണിരിക്കെയാണ് അദ്ദേഹത്തിന്റെ വിശ്വസ്തന്‍ അംബാസഡറായെത്തുന്നത്. എന്നാൽ, ഗോറിന്റെ നിയമനത്തിന് യു.എസ് കോണ്‍ഗ്രസിന്റെ കൂടി അംഗീകാരം നേടിയെടുക്കേണ്ടതുണ്ടെന്ന സാങ്കേതികപ്രക്രിയ ബാക്കിയുണ്ട്. 
2023 മെയ് മുതല്‍ ഇക്കഴിഞ്ഞ ജനുവരി വരെ ഇന്ത്യയിലെ യു.എസ് അംബാസഡറായിരുന്ന എറിക് ഗാര്‍സെറ്റിയുടെ പിന്‍ഗാമിയായെത്തുന്ന 38 കാരനായ ഗോറിന് രാഷ്ട്രീയത്തിനപ്പുറമുള്ള ബന്ധമാണ് ട്രംപുമായുള്ളത്. വിദേശയാത്രകളില്‍ ട്രംപിനെ അനുഗമിക്കുക, ദേശീയ സുരക്ഷാ കൗണ്‍സില്‍ ജീവനക്കാരെ നിയമിക്കുകയും നീക്കുകയും ചെയ്യുക എന്നിവയായിരുന്നു ഗോറിന്റെ ചുമതലകള്‍. 

ട്രംപിന്റെ പ്രചാരണത്തിന് മുന്നില്‍നില്‍ക്കുകയും പ്രസിഡന്റായതോടെ അദ്ദേഹത്തിന്റെ ടീമില്‍ പ്രത്യേക ഇടംപിടിക്കുകയും ചെയ്ത ശതകോടീശ്വരനും ടെസ്‍ല മേധാവിയുമായ ഇലോണ്‍ മസ്‌കിന്റെ പ്രധാന എതിരാളിയായി അറിയപ്പെടുന്ന വ്യക്തിയാണ് ഗോര്‍. ഗോറിനോടുള്ള ട്രംപിന്റെ അടുപ്പമായിരുന്നു അദ്ദേഹവുമായി പിന്നീട് അകലാന്‍ മസ്‌കിനെ പ്രേരിപ്പിച്ച ഘടകങ്ങളിലൊന്ന്.

Sergio Gore, a confidant of President Donald Trump and White House personnel director, is the new U.S. ambassador to India.