ന്യൂയോർക്ക്: ഫലസ്തീനെ രാഷ്ട്രമായി അംഗീകരിക്കുന്നതിനെ അപലപിച്ചും ഹമാസ് തടവിൽവച്ച ബന്ദികളെ തിരികെ അയക്കണമെന്ന് ആവശ്യപ്പെട്ടും യു.എൻ പൊതുസഭയിൽ അമേരിക്കൻ പ്രസിഡന്റ് ഡൊണാൾഡ് ട്രംപ്. ഫലസ്തീനെ രാഷ്ട്രമായി അംഗീകരിക്കുന്നത് ഹമാസിനുള്ള റിവാർഡ് ആണെന്ന ഇസ്റാഈൽ നിലപാട് ട്രംപ് ആവർത്തിച്ചു. യു.എന്നിന്റെ 80ാം വാർഷികത്തോടനുബന്ധിച്ചാണ് പൊതുസഭ ചേർന്നത്.

ഗസ്സയിലെ ബന്ദികളെ മോചിപ്പിക്കാനാണ് ലോക നേതാക്കൾ ചേർന്നു പ്രവർത്തിക്കേണ്ടതെന്ന് ട്രംപ് പറഞ്ഞു. 15 മിനുട്ടാണ് ട്രംപിന് പ്രസംഗിക്കാൻ സമയം നൽകിയതെങ്കിലും 55 മിനുട്ട് അദ്ദേഹത്തിന്റെ പ്രസംഗം നീണ്ടു. യു.എന്നിന്റെ ലക്ഷ്യത്തെയും ട്രംപ് ചോദ്യം ചെയ്തു. ലോകത്ത് ഗസ്സ, സുദാൻ, ഉക്രൈൻ എന്നിവിടങ്ങളിലെല്ലാം യുദ്ധം നടക്കുകയാണ്. ഇവിടെയൊന്നും ആരെയും സഹായിക്കാൻ യു.എന്നിന് കഴിഞ്ഞില്ലെന്ന് ട്രംപ് കുറ്റപ്പെടുത്തി. എന്നാൽ താൻ 7 യുദ്ധങ്ങൾ അവസാനിപ്പിച്ചെന്നും ട്രംപ് ആവർത്തിച്ചു.

ട്രംപിന്റെ പ്രസംഗത്തിനു മുൻപ് യു.എന്നിനു പുറത്ത് പ്രതിഷേധം ശക്തമായിരുന്നു. നിരവധി പേരെ അറസ്റ്റ് ചെയ്തു. ലണ്ടൻ മേയർ സിദ്ദീഖ് ഖാനെതിരേ വിദ്വേഷ പ്രസംഗവും ട്രംപ് നടത്തി. സിദ്ദീഖ് ഖാൻ മുസ്്ലിമാണെന്നും ലണ്ടനിൽ അദ്ദേഹം ശരീഅത്ത് നിയമം നടപ്പാക്കാൻ ശ്രമിക്കുകയാണെന്നും ട്രംപ് ആരോപിച്ചു.

ട്രംപിനു മുൻപ് സംസാരിച്ച അന്റോണിയോ ഗുട്ടെറസ് ഇസ്റാഈൽ അന്താരാഷ്ട്ര നിയമം പാലിക്കണമെന്ന് ആവശ്യപ്പെട്ടു. ട്രംപിനു ശേഷം തുർക്കി പ്രസിഡന്റ് റജബ് ത്വയ്യിബ് ഉർദുഗാനാണ് പ്രസംഗിച്ചത്. ഫലസ്തീൻ പ്രസിഡന്റ് മഹ്്മൂദ് അബ്ബാസിന് യു.എൻ സമ്മേളനത്തിൽ പങ്കെടുക്കാൻ വിസ നിഷേധിച്ച യു.എസ് നടപടി അദ്ദേഹം ചോദ്യം ചെയ്തു. 

ഗസ്സയെ ഇസ്റാഈൽ പട്ടിണിക്കിട്ടെന്ന് ഉർദുഗാൻ പട്ടിണിക്കോലങ്ങളായ കുട്ടികളുടെ ചിത്രം ഉയർത്തിക്കാട്ടി പറഞ്ഞു. 250 മാധ്യമപ്രവർത്തകരെ ഗസ്സയിൽ കൊന്നത് വംശഹത്യയുടെ വിവരം പുറത്തുവരാതിരിക്കാനാണ്. ഖത്തറിനെ ആക്രമിച്ചതോടെ ഇസ്റാഈലിന്റെ സർവ നിയന്ത്രണവും നഷ്ടപ്പെട്ടതായും ഉർദുഗാൻ പറഞ്ഞു.