ന്യൂയോര്‍ക്ക്: ഗസ്സയില്‍ കൂട്ടക്കുരുതി നടത്തുന്ന ഇസ്‌റാഈലിനെതിരെ ഒന്നിച്ച് പ്രതിഷേധിക്കാന്‍ ലോകരാജ്യങ്ങളോട് ഫലസ്തീന്റെ അഭ്യര്‍ത്ഥന. യു.എന്‍ ജനറല്‍ അസംബ്ലിയില്‍ ഇസ്‌റാഈല്‍ പ്രധാനമന്ത്രി ബിന്യമിന്‍ നെതന്യാഹു പ്രസംഗത്തിന് വാക്ക്ഔട്ട് നടത്താനാണ് ഫലസ്തീന്‍ ആവശ്യപ്പെടുന്നത്. ഇന്ന് വൈകീട്ട് ഇന്ത്യന്‍ സമയം 6.30ന് യു.എന്‍ ജനറല്‍ അസംബ്ലിയെ അഭിസംബോധന ചെയ്ത് സംസാരിക്കാന്‍ നെതന്യാഹു എഴുന്നേറ്റാല്‍ കൂട്ടത്തോടെ ഇറങ്ങിപ്പോകണമെന്ന് വിവിധ രാജ്യങ്ങള്‍ക്ക് നല്‍കിയ കത്തില്‍ ഫലസ്തീന്‍ ആവശ്യപ്പെട്ടതായി ദ ജറൂസലേം പോസ്റ്റ് റിപ്പോര്‍ട്ട് ചെയ്യുന്നു. തങ്ങളുടെ എക്‌സ്‌ക്യൂസിവ് എന്ന് പറഞ്ഞാണ് ജെറുസലേം പോസ്റ്റ് വാര്‍ത്ത പ്രസിദ്ധീകരിച്ചിരിക്കുന്നത്. 

നെതന്യാഹുവിന്റെ പ്രസംഗത്തിന് മുമ്പ് പരമാവധി പ്രതിനിധികളെ ജനറല്‍ അസംബ്ലി ഹാളിലേക്കും സന്ദര്‍ശക ഗാലറിയിലേക്കും കൊണ്ടുവരാന്‍ കത്ത് ആവശ്യപ്പെടുന്നു. തുടര്‍ന്ന് നെതന്യാഹു വേദിയിലേക്ക് കയറുന്നുവെന്ന് ജനറല്‍ അസംബ്ലി പ്രസിഡന്റ് പ്രഖ്യാപിക്കുന്ന നിമിഷം ഒരുമിച്ച് ഇറങ്ങിപ്പോകാനുും കത്തില്‍ നിര്‍ദ്ദേശിക്കുന്നു. വംശഹത്യ, യുദ്ധക്കുറ്റങ്ങള്‍, നിയമവിരുദ്ധ അധിനിവേശം എന്നിവയില്‍ പങ്കാളികളാകാന്‍ ആരും തയ്യാറല്ലെന്ന് നെതന്യാഹുവിനെയും ഇസ്‌റാഈല്‍ സര്‍ക്കാരിനെയും വ്യക്തമായി ബോധ്യപ്പെടുത്തുക എന്നതാണ് ബഹിഷ്‌കരണത്തിന്റെ ലക്ഷ്യം. 

ALSO READ: വിലങ്ങ് വീണാലോ?, അറസ്റ്റ് പേടിച്ച് യു.എസ് യാത്രയുടെ റൂട്ട് മാറ്റി നെതന്യാഹു; യൂറോപ്പിന്റെ ആകാശം തൊടാതെ വളഞ്ഞ് വഴി പിടിച്ച് ഇസ്‌റാഈല്‍ പ്രധാനമന്ത്രി
 
അതേസമയം, നീക്കത്തിനെതിരെ ഐക്യരാഷ്ട്രസഭയിലെ ഇസ്‌റാഈല്‍ അംബാസഡര്‍ ഡാനി ഡാനോണ്‍ രംഗത്തുവന്നു.
 ഇസ്‌റാഈലിനെതിരെ നുണകളുടെയും പ്രകോപനങ്ങളുടെയും ഒരു പ്രളയം ഉള്‍പ്പെട്ട ഒരാഴ്ചയ്ക്ക് ശേഷം, ഫലസ്തീന്‍ പ്രതിനിധികള്‍ ഐക്യരാഷ്ട്രസഭയില്‍ മറ്റൊരു ഷോ ആസൂത്രണം ചെയ്യുകയാണെന്ന് ഡാനി കുറ്റപ്പെടുത്തി.  അതിന്റെ ഭാഗമാണ് പ്രധാനമന്ത്രിയുടെ പ്രസംഗത്തിന്റെ തുടക്കത്തില്‍ നിരവധി രാജ്യങ്ങളില്‍ നിന്നുള്ള പ്രതിനിധികള്‍ വാക്ക്ഔട്ട് നടത്തണമെന്ന് ആവശ്യപ്പെടുന്നത്- ഡാനി പറഞ്ഞു.

കഴിഞ്ഞവര്‍ഷം ജനറല്‍ അസംബ്ലിയില്‍ നെതന്യാഹു സംസാരിക്കുന്നതിനിടെ സമാന രീതിയില്‍ പ്രതിനിധികള്‍ ഇറങ്ങിപ്പോയത് വന്‍ ചര്‍ച്ചയായിരുന്നു. ഇസ്‌റാഈല്‍ നടത്തുന്ന കൂട്ടക്കുരുതിക്കെതിരായുള്ള പ്രതിഷേധമായാണ് നീക്കം വിലയിരുത്തപ്പെട്ടത്. ഇസ്‌റാഈലിന് ഇത് വന്‍ നാണക്കേടായി മാറിയിരുന്നു. 

ALSO READ: ഫലസ്തീനികളുടെ ഫോണ്‍കോളുകള്‍ കൂട്ടത്തോടെ ചോര്‍ത്തുന്നു, നിരീക്ഷണമെന്ന പേരില്‍ ദുരുപയോഗം; ഇസ്‌റാഈല്‍ സൈന്യത്തിന് നല്‍കിയിരുന്നു ചില സേവനങ്ങള്‍ നിര്‍ത്തലാക്കി മൈക്രോസോഫ്റ്റ് 

ഐക്യരാഷ്ട്രസഭയിലെ 193 അംഗരാജ്യങ്ങളില്‍ നിലവില്‍ 159 പേര്‍ ഫലസ്തീന്‍ രാഷ്ട്രത്തെ അംഗീകരിച്ചവരാണ്. ഫ്രാന്‍സ്, യുകെ, കാനഡ, ആസ്‌ത്രേലിയ, ബെല്‍ജിയം എന്നിവയുള്‍പ്പെടെയുള്ള രാജ്യങ്ങള്‍ അടുത്തിടെയാണ് ഫലസ്തീന്‍ രാഷ്ട്രത്തെ അംഗീകരിച്ചത്.

കഴിഞ്ഞവര്‍ഷം നെതന്യാഹു വാഷിംഗ്ടണ്‍ സന്ദര്‍ശിച്ചപ്പോഴും ശക്തമായ പ്രതിഷേധമുണ്ടായിരുന്നു. നെതന്യാഹു  യു.എസ് കോണ്‍ഗ്രസില്‍ സംസാരിക്കുന്നതിനിടെ പുറത്ത് വന്‍ പ്രതിഷേധമാണ് അരങ്ങേറിയത്. ഹമാസ് ബന്ദികളാക്കിയവരുടെ ബന്ധുക്കള്‍ ഉള്‍പ്പെടെ ആയിരങ്ങളാണ് യു.എസ് കോണ്‍ഗ്രസിന് മുന്നില്‍ പ്രതിഷേധിച്ചത്.

അതിനിടെ, അറസ്റ്റ് ഭയന്ന് നെതന്യാഹു ആകാശ യാത്രയുടെ റൂട്ട് പോലും മാറ്റിയിരിക്കുകയാണ്. അന്താരാഷ്ട്ര നീതിന്യായ കോടതിയുടെ അറസ്റ്റ് വാറണ്ട് നിലനില്‍ക്കുന്ന സാഹചര്യത്തില്‍ യു.എസിലേക്കുള്ള യാത്രക്കിടെ നെതന്യാഹു റൂട്ട് മാറ്റിതായി റിപ്പോര്‍ട്ടുകള്‍ പറയുന്നു. യുറോപ്യന്‍ രാജ്യങ്ങളെ പരമാവധി ഒഴിവാക്കിയായിരുന്നു നെതന്യാഹുവിന്റെ യാത്ര. യു.എന്‍ ജനറല്‍ അസംബ്ലി സമ്മേളനത്തില്‍ പങ്കെടുക്കുന്നതിന് വേണ്ടിയാണ് നെതന്യാഹു യു.എസിലേക്ക് എത്തിയത്.

palestine has called on world nations to stage a walkout during israeli prime minister benjamin netanyahu’s speech at the un general assembly, protesting the alleged genocide in gaza. according to the jerusalem post, the appeal was sent to multiple countries ahead of the address.