ന്യൂഡല്‍ഹി: ദീപാവലി ബോണസ് നല്‍കാത്തതിനാല്‍ കമ്പനിക്ക് മുട്ടന്‍പണി കൊടുത്ത് ടോള്‍പ്ലാസ ജീവനക്കാര്‍. ആഗ്ര-ലക്നൗ എക്‌സ്പ്രസ്സ് വേയുടെ ഭാഗമായ ഒരു ടോള്‍ പ്ലാസയിലെ ജീവനക്കാരാണ് പ്രതിഷേധത്തിന്റെ ഭാഗമായി കമ്പനിക്ക് പണി കൊടുത്തത്.വാഹനങ്ങളെ ടോള്‍ വാങ്ങാതെ കടത്തിവിട്ടുകൊണ്ടാണ് ജീവനക്കാര്‍ പ്രതിഷേധം രേഖപ്പെടുത്തിയത്. ആഗ്ര-ലഖ്നൗ എക്സ്പ്രസ് വേയിലെ ഫത്തേഹാബാദ് ടോള്‍ പ്ലാസയിലാണ് സംഭവം. 

തൊഴിലാളികള്‍ക്ക് ദീപാവലിയോട് അനുബന്ധിച്ച് ബോണസ് നല്‍കിയെങ്കിലും ഇത് തൊഴിലാളികളുടെ പ്രതീക്ഷയ്‌ക്കൊത്ത് ഉയര്‍ന്നതായിരുന്നില്ല. 1100 രൂപയാണ് ഓരോ തൊഴിലാളിക്കും ബോണസായി ലഭിച്ചത്. ഇതില്‍ പ്രതിഷേധിച്ച് ടോള്‍ ഗേറ്റുകളെല്ലാം തുറന്നിട്ട് വാഹനങ്ങളെ കടത്തിവിടുകയായിരുന്നു. ആയിരക്കണക്കിന് വാഹനങ്ങളാണ് ടോള്‍ അടയ്ക്കാതെ കടന്നുപോയത്. ലക്ഷങ്ങളുടെ നഷ്ടമാണ് ഇതിലൂടെ കമ്പനിക്ക് ഉണ്ടായത്.

ശ്രീസായ് ആന്‍ഡ് ദത്തര്‍ എന്ന കമ്പനിയാണ് ഫത്തേഹാബാദ് പ്ലാസയുടെ നടത്തിപ്പ് ഏറ്റെടുത്തിരുന്നത്. പത്തുമണിക്കൂറോളം പ്രതിഷേധം നീണ്ടു. ഒടുവില്‍ ബോണസ് നല്‍കാമെന്ന അധികൃതരുടെ ഉറപ്പിന്മേലാണ് സമരം പിന്‍വലിക്കപ്പെട്ടത്.