കൊല്‍ക്കത്ത: ബംഗ്ലാദേശ് തലസ്ഥാനമായ ധാക്കക്ക് സമീപം 5.5 തീവ്രത രേഖപ്പെടുത്തിയ ഭൂകമ്പം.  ധാക്കയില്‍ നിന്ന് 50 കിലോമീറ്റര്‍ അകലെ നര്‍സിങ്ദിയില്‍ ഭൂമിക്കടിയില്‍ 10 കിലോമീറ്റര്‍ താഴ്ചയിലാണ് ഭൂകമ്പത്തിന്റെ പ്രഭവ കേന്ദ്രമെന്ന് യു.എസ്. ജിയോളജിക്കല്‍ സര്‍വേ അറിയിച്ചു.

ധാക്കയിലെ ഭൂകമ്പത്തിന് പിന്നാലെ കൊല്‍ക്കത്തയിലും വടക്കുകിഴക്കന്‍ ഇന്ത്യയിലെ വിവിധ പ്രദേശങ്ങളിലും പ്രകമ്പനം അനുഭവപ്പെട്ടതായി റിപ്പോര്‍ട്ടുകള്‍ പറയുന്നു. പ്രകമ്പനം പശ്ചിമ ബംഗാളിലെ കൂച്ച് ബിഹാര്‍, ദക്ഷിന്‍, ഉത്തര ദിനാജ്പൂര്‍ അടക്കമുള്ള സ്ഥലങ്ങള്‍ വരെ എത്തി. 

ALSO READ: ഉപ്പ ഉമ്മ കുഞ്ഞുമക്കള്‍....കുടുംബത്തോടെ കൊന്നൊടുക്കി ഇസ്‌റാഈല്‍; വെടിനിര്‍ത്തല്‍ ലംഘിച്ച് ഗസ്സയില്‍ വീണ്ടും വ്യോമാക്രമണം, 28 പേര്‍ കൊല്ലപ്പെട്ടു

രാവിലെ 10.10ന് അനുഭവപ്പെട്ട പ്രകമ്പനം ഏതാനും സെക്കന്റുകള്‍ നീണ്ടുനിന്നു. പരിഭ്രാന്തരായ ആളുകള്‍ വീടുകളില്‍ നിന്നും കെട്ടിടങ്ങളില്‍ നിന്നും പുറത്തേക്ക് ഓടി. കൊല്‍ക്കത്തയിലെ പ്രകമ്പനത്തിന്റെ സി.സി.ടി.വി ദൃശ്യങ്ങള്‍ ആളുകള്‍ സമൂഹമാധ്യമങ്ങളില്‍ പോസ്റ്റ് ചെയ്തിട്ടുണ്ട്. ഗുവാഹത്തി, അഗര്‍ത്തല, ഷില്ലോങ് എന്നീ പട്ടണങ്ങളിലെ നിരവധി വീടുകളും പ്രകമ്പനത്തില്‍ കുലുങ്ങി. അതേസമയം, നാശനഷ്ടങ്ങള്‍ റിപ്പോര്‍ട്ട് ചെയ്തിട്ടില്ല.

പ്രകമ്പനത്തെ തുടര്‍ന്ന് ധാക്കയില്‍ നടന്നു കൊണ്ടിരുന്ന ബംഗ്ലാദേശ്- അയര്‍ലന്‍ഡ് ക്രിക്കറ്റ് ടെസ്റ്റ് മത്സരം തടസപ്പെട്ടിരുന്നു. അല്‍പനേരത്തിന് ശേഷം മത്സരം പുനരാരംഭിച്ചു.