ടുറിൻ: പോർച്ചുഗീസ് സൂപ്പർതാരം ക്രിസ്റ്റ്യാനോ റൊണാൾഡോയുമായി യുവന്റസ് ഉണ്ടാക്കിയ കരാർ ക്ലബ്ബിന്റെ അടിസ്ഥാനപരമായ സ്വഭാവത്തെ (DNA) നശിപ്പിച്ചുവെന്ന് ഇതിഹാസ ഗോൾകീപ്പർ ജിയാൻലൂയിഗി ബുഫൺ അഭിപ്രായപ്പെട്ടു. റൊണാൾഡോ ക്ലബ്ബിൽ ചേർന്നതിന് ശേഷം യുവന്റസ് ഒരു ടീം എന്ന നിലയിൽ കളിക്കുന്നതിൽ പരാജയപ്പെട്ടുവെന്നും അദ്ദേഹം വിശ്വസിക്കുന്നു.ഈ വർഷം ആദ്യം റൊണാൾഡോയെക്കുറിച്ച് സംസാരിക്കവെയാണ് ബുഫൺ തൻ്റെ അഭിപ്രായം ഡെയ്‌ലി സബ വഴി  വ്യക്തമാക്കിയത്.

"റൊണാൾഡോ വന്ന ആദ്യ വർഷം തന്നെ യുവന്റസിന് ചാമ്പ്യൻസ് ലീഗ് നേടാൻ അവസരം ലഭിച്ചു, അതായത് ഞാൻ പാരീസ് സെന്റ് ജെർമെയ്‌നിൽ ആയിരുന്ന വർഷം. അന്ന് എന്താണ് സംഭവിച്ചതെന്ന് എനിക്ക് മനസ്സിലായില്ല. ഞാൻ യുവന്റസിൽ തിരിച്ചെത്തിയപ്പോൾ, റൊണാൾഡോയ്‌ക്കൊപ്പം രണ്ട് വർഷം കളിച്ചു. ഞങ്ങൾ ഒരുമിച്ച് നന്നായി കളിച്ചു, പക്ഷേ ഒരു ടീം എന്ന നിലയിലുള്ള യുവന്റസിന്റെ 'ഡിഎൻഎ' നഷ്ടപ്പെട്ടു എന്ന് ഞാൻ കരുതുന്നു."

"2017-ൽ ഞങ്ങൾ ചാമ്പ്യൻസ് ലീഗ് ഫൈനലിൽ എത്തിയത് അനുഭവസമ്പന്നരായ ഒരു ടീമായിരുന്നതുകൊണ്ടാണ്. എന്നാൽ എല്ലാറ്റിനുമുപരിയായി, ഞങ്ങൾ ഒരൊറ്റ യൂണിറ്റായിരുന്നു. ഗ്രൂപ്പിലെ സ്ഥാനങ്ങൾക്കായുള്ള മത്സരം വളരെ ശക്തമായിരുന്നു. റൊണാൾഡോയോടൊപ്പം ഞങ്ങൾക്ക് അത് നഷ്ടമായി." ബുഫൺ പറഞ്ഞു.

റയൽ മാഡ്രിഡിൽ നിന്നും 2018-ൽ യുവന്റസിലെത്തിയ ക്രിസ്റ്റ്യാനോ റൊണാൾഡോ 2021 വരെ ക്ലബ്ബിൽ തുടർന്നു. മൂന്ന് വർഷത്തെ കരിയറിൽ 134 മത്സരങ്ങളിൽ നിന്ന് 101 ഗോളുകളും 28 അസിസ്റ്റുകളും താരം സ്വന്തമാക്കി. ഈ കാലയളവിൽ രണ്ട് സീരി എ കിരീടങ്ങൾ, ഒരു കോപ്പ ഇറ്റാലിയ കിരീടം, രണ്ട് സൂപ്പർകോപ്പ ഇറ്റാലിയാന കിരീടങ്ങൾ എന്നിവ യുവന്റസ് നേടി. എന്നാൽ ക്ലബ്ബിന്റെ പ്രധാന ലക്ഷ്യമായിരുന്ന ചാമ്പ്യൻസ് ലീഗ് കിരീടം നേടാൻ റൊണാൾഡോയുടെ സാന്നിധ്യത്തിലും അവർക്ക് സാധിച്ചില്ല.

ഒരു ടീം എന്ന നിലയിൽ ക്ലബ്ബ് അനുഭവിച്ച കൂട്ടായ ശക്തിയാണ് റൊണാൾഡോയുടെ വരവോടെ നഷ്ടമായതെന്ന ബുഫണിൻ്റെ വാക്കുകൾ ഫുട്ബോൾ ലോകത്ത് വലിയ ചർച്ചാവിഷയമായിരിക്കുകയാണ്.