തിരുവനന്തപുരം: ആറ്റിങ്ങലിൽ വാഹനാപകടത്തിൽ രണ്ട് പേർക്ക് പരുക്ക്. ആറ്റിങ്ങൽ ദേശീയ പാതയിൽ എൽഐസി ഓഫീസിനു എതിർ വശത്തായി ഇന്ന് വൈകുന്നേരമാണ് അപകടം നടന്നത്. നിർത്തിയിട്ട ലോറിയുടെ പുറകിൽ ഓട്ടോറിക്ഷ ഇടിക്കുകയായിരുന്നു. കോരാണി ഭാഗത്തു നിന്നും കല്ലമ്പലം ഭാഗത്തേക്ക് പോവുകയായിരുന്ന ഓട്ടോറിക്ഷയാണ് ഇടിച്ചത്. 

അപകടത്തിൽ ഓട്ടോ പൂർണമായും തകർന്നു. രണ്ട് പേർ വാഹനത്തിനുള്ളിൽ കുടുങ്ങുകയും തുടർന്ന് ഫയർ ഫോഴ്‌സ് എത്തി വാഹനം പൊളിച്ചുകൊണ്ട് ഡ്രൈവറെയും യാത്രക്കാരിയെയും പുറത്തെടുക്കുകയായിരുന്നു. ഇവരെ വലിയകുന്ന് ആശുപത്രിയിൽ എത്തിക്കുകയും പരുക്ക് ഗുരുതരമായതോടെ തിരുവനന്തപുരം മെഡിക്കൽ കോളേജിലേക്കും മാറ്റുകയായിരുന്നു.