കുണിയ: ആദര്‍ശരംഗത്ത് വ്യതിചലിക്കാതെ നിലകൊള്ളുകയും, വിശ്വാസരംഗത്ത് നുഴഞ്ഞുകയറിയ ആശയങ്ങളെ വിവേകപൂര്‍വം ഇല്ലാതാക്കുകയും ചെയ്ത പ്രസ്ഥാനമാണ് സമസ്തയെന്ന് പാണക്കാട് മുനവ്വറലി ശിഹാബ് തങ്ങള്‍. സമസ്ത നൂറാം വാര്‍ഷികസമ്മേളനത്തില്‍ ഇന്നലെ ഉച്ചക്ക് നടന്ന പഠനക്യാംപ് സെഷന്‍ ഉദ്ഘാടനം ചെയ്യുകയായിരുന്നു തങ്ങള്‍.    
                                                                                 
വിജ്ഞാനത്തിന്റെ അഭാവമാണ് വൈകാരികതയും പരാജയവും സൃഷ്ടിക്കുന്നത്, മതനിരാസത്തിലൂടെയും മതവിരുദ്ധ ചിന്താഗതിയിലൂടെയും മനുഷ്യന്റെ സ്വത്വബോധമാണ് നഷ്ടപ്പെടുന്നു. ഇസ്‍ലാം എന്നാല്‍ ഭയവും ഭീകരതയുമല്ല, കാരുണ്യവും സ്‌നേഹവുമാണെന്ന പാഠമാണെന്ന് സമസ്ത സമൂഹത്തില്‍ സ്ഥാപിച്ചു. ഇത്തരത്തില്‍ മൂല്യങ്ങള്‍ കാത്തുസൂക്ഷിച്ചു ഇടപെടാന്‍ സാധ്യമായത് സമസ്തയിലൂടെയാണ്. ഇതിന്റെ തുടര്‍ച്ച കാത്തൂസൂക്ഷിക്കാന്‍ സമസ്തയെ ശക്തപ്പെടുത്തണം. സമസ്തയുടെ നൂറാം വാര്‍ഷികം  ആഘോഷമായല്ല നാം കാണുന്നത്, അത് അതിജീവനത്തിന്റേയും സംരക്ഷണത്തിന്റേയും ചരിത്രമാണെന്നും തങ്ങള്‍ പറഞ്ഞു.