ബെംഗളൂരു: മൂന്ന് വർഷത്തോളമായി പ്രണയത്തിലായിരുന്ന യുവതി മറ്റൊരാളുമായി വിവാഹം ഉറപ്പിച്ചെന്ന വാർത്ത അറിയിച്ചതിന് പിന്നാലെ യുവാവ് ജീവനൊടുക്കി. പ്രശസ്ത ബോഡി ബിൽഡറും ജിം പരിശീലകനുമായ കിരൺ (26) ആണ് മഹാലക്ഷ്മി ലേഔട്ടിലെ ഗെലയാര ബലഗയിലുള്ള വീട്ടിൽ തൂങ്ങിമരിച്ചത്.

സംഭവം ഇങ്ങനെ:

കിരണും യുവതിയും കഴിഞ്ഞ മൂന്ന് വർഷമായി പ്രണയത്തിലായിരുന്നു. എന്നാൽ ശനിയാഴ്ച വൈകുന്നേരം യുവതിയെ നേരിൽ കണ്ടപ്പോൾ തന്റെ വിവാഹം വീട്ടുകാർ മറ്റൊരാളുമായി ഉറപ്പിച്ച കാര്യം അവർ കിരണിനെ അറിയിച്ചു. വിവാഹക്ഷണക്കത്തും വിവാഹത്തിനായി വാങ്ങിയ സാരിയും യുവതി കിരണിനെ കാണിച്ചതായാണ് വിവരം.

വാലന്റൈൻസ് ഡേ ആഘോഷിക്കാൻ പദ്ധതിയിട്ടിരുന്ന കിരണിനെ ഈ വാർത്ത മാനസികമായി തകർത്തു. വീട്ടിലെത്തിയ കിരൺ അമ്മയോട് ഒരു വെള്ളക്കടലാസും പേനയും ആവശ്യപ്പെട്ടു. സാമ്പത്തിക ഇടപാടുകൾ എഴുതാനാണെന്ന് പറഞ്ഞ് മുറിയിൽ കയറി വാതിലടച്ച കിരൺ പിന്നീട് തൂങ്ങിമരിക്കുകയായിരുന്നു.

 മുറിയിൽ നിന്ന് പൊലിസ് ആത്മഹത്യാക്കുറിപ്പ് കണ്ടെടുത്തു. തന്റെ മരണത്തിന് ഉത്തരവാദികൾ കാമുകിയും അവരുടെ അമ്മയുമാണെന്ന് കുറിപ്പിൽ പരാമർശിക്കുന്നുണ്ട്. സ്വന്തം മൊബൈൽ ഫോണിന്റെ പാസ്‌വേഡും അദ്ദേഹം കുറിപ്പിൽ എഴുതി വെച്ചിരുന്നു.

കുടുംബത്തിന്റെ പരാതി:

കാമുകിയുടെ കടം വീട്ടാനായി കിരൺ തന്റെ സമ്പാദ്യം മുഴുവൻ ചിലവഴിച്ചിരുന്നതായി ബന്ധുക്കൾ ആരോപിക്കുന്നു. കിരണിന്റെ കുടുംബം നൽകിയ പരാതിയുടെ അടിസ്ഥാനത്തിൽ മഹാലക്ഷ്മി ലേഔട്ട് പൊലിസ് കേസെടുത്ത് അന്വേഷണം ആരംഭിച്ചു. മൃതദേഹം പോസ്റ്റ്‌മോർട്ടം നടപടികൾക്കായി മാറ്റി.

(ശ്രദ്ധിക്കുക; ആത്മഹത്യ ഒന്നിനും പരിഹാരമല്ല. മാനസികാരോഗ്യ വിദഗ്ധരുടെ സഹായംതേടുക, 'ദിശ' ഹെൽപ്പ്ലൈനിൽ വിളിക്കുക. ടോൾ ഫ്രീ നമ്പർ: 1056, 0471 2552056)