മണ്ണാര്‍ക്കാട്: രോഗീപരിചരണത്തിന്റെ ധനശേഖരണാര്‍ഥം കനിവ് കര്‍ക്കിടാംകുന്നും, പാലിയേറ്റീവ് കെയര്‍ എടപ്പെറ്റയും ചേര്‍ന്ന് നവമ്പര്‍ 15 മുതല്‍ ഒരു മാസം നീണ്ടുനില്‍ക്കുന്ന അഖിലേന്ത്യ ഫുട്‌ബോള്‍ ടൂര്‍ണമെന്റ് നടത്തുമെന്ന് ഭാരവാഹികള്‍ വാര്‍ത്ത സമ്മേളത്തില്‍ പറഞ്ഞു. കര്‍ക്കിടാംകുന്ന് ഐ.സി.എസ് യു.പി സ്‌കൂള്‍ ഗ്രൗണ്ടിലാണ് മത്സരം സംഘടിപ്പിക്കുന്നത്. കഴിഞ്ഞ അഞ്ചു വര്‍ഷമായി അലനല്ലൂര്‍ പഞ്ചായത്തിലെ കര്‍ക്കിടാംകുന്ന് മേഖലയില്‍ കിടപ്പിലായ രോഗികളെ മാതൃകാപരമായി പരിചരിക്കുന്ന ട്രസ്റ്റാണ് കനിവ് കര്‍ക്കിടാംകുന്ന്. സമാന പ്രവര്‍ത്തനം നടത്തുന്ന പാലക്കാട് ജില്ലയോട് ചേര്‍ന്ന് കിടക്കുന്ന മലപ്പുറം ജില്ലയിലെ എടപ്പറ്റ പഞ്ചായത്തിലെ പാലിയേറ്റീവ് കെയറിന്റെ പ്രവര്‍ത്തനങ്ങള്‍ക്കുമുളള ധനശേഖരണമാണ് ടൂര്‍ണമെന്റ് കൊണ്ട് ലക്ഷ്യമിടുന്നത്.