താമരശേരി: ആദിവാസികള്‍ക്ക് ഭവന നിര്‍മാണത്തിനു നല്‍കുന്ന തുക എട്ടുലക്ഷം രൂപയാക്കി ഉയര്‍ത്തണമെന്ന് ആദിവാസി ക്ഷേമസമിതി ജില്ലാ സമ്മേളനം ആവശ്യപ്പെട്ടു. പട്ടികവര്‍ഗ വിദ്യാര്‍ഥികള്‍ക്ക് പ്രീമെട്രിക് ഹോസ്റ്റലുകള്‍ നിര്‍മിക്കണമെന്നും ആദിവാസി കോളനികളില്‍ മദ്യത്തിന്റെയും ലഹരി വസ്തുകളുടെയും ഉപയോഗം നിയന്ത്രിക്കാന്‍ ബോധവല്‍ക്കരണ പരിപാടികള്‍ സംഘടിപ്പിക്കാനും സര്‍ക്കാര്‍ നടപടികള്‍ സ്വീകരിക്കണമെന്നും സമ്മേളനം ആവശ്യപ്പെട്ടു. കൊടുവള്ളി കളരാന്തിരിയില്‍ വി.എം ബാബു നഗറില്‍ നടന്ന പ്രതിനിധി സമ്മേളനം ജോര്‍ജ് എം. തോമസ് എം.എല്‍.എ ഉദ്ഘാടനം ചെയ്തു. ബാലന്‍ പൂളയില്‍ അധ്യക്ഷനായി.
സി.പി.എം ഏരിയാ സെക്രട്ടറി ആര്‍.പി ഭാസ്‌കരന്‍, എ.കെ.എസ് സംസ്ഥാന നേതാക്കളായ പോക്ലാവ് കൃഷ്ണന്‍, സീതാ ബാലന്‍, പി.സി വേലായുധന്‍, എം.കെ രാജന്‍ പ്രസംഗിച്ചു. ജില്ലാ സെക്രട്ടറി കെ.കെ ബാബു പ്രവര്‍ത്തന റിപ്പോര്‍ട്ടും സംസ്ഥാന കമ്മിറ്റിയംഗം പി. കേശവന്‍ സംഘടനാ റിപ്പോര്‍ട്ടും അവതരിപ്പിച്ചു. പി.സി ഷാജി രക്തസാക്ഷി പ്രമേയവും ശ്യാംകിഷോര്‍ അനുശോചന പ്രമേയവും അവതരിപ്പിച്ചു. സ്വാഗതസംഘം ചെയര്‍മാന്‍ കെ. ബാബു സ്വാഗതം പറഞ്ഞു.
ഭാരവാഹികളായി ശ്യാംകിഷോര്‍ തിരുവമ്പാടി (പ്രസി). വി.സി കേളപ്പന്‍, ടി.കെ.എം രാജന്‍, പ്രേമ പൂളയില്‍(വൈ. പ്രസി), കെ.കെ ബാബു (സെക്ര), ടി.പി ചന്തുക്കുട്ടി, ലത കൊടുവള്ളി, വി. സുരേന്ദ്രന്‍ (ജോ. സെക്ര), ബാലന്‍ പൂളയില്‍ (ട്രഷ) എന്നിവരെ തിരഞ്ഞെടുത്തു.