ചാരുംമൂട്: കെ.പി റോഡില്‍ സ്‌ക്കൂള്‍ സമയങ്ങളില്‍ നിരോധനം കാറ്റില്‍ പറത്തി അമിത വേഗതയില്‍ മണ്ണുമായി പോകുന്നതായുള്ള വാര്‍ത്തയെത്തുടര്‍ന്ന് മോട്ടോര്‍ വാഹന വകുപ്പ് ഉദ്യോഗസ്ഥര്‍ പരിശോധനക്ക് ഇറങ്ങി.
രാവിലെ മുതല്‍ കെ.പി റോഡില്‍ മണ്ണുമായി നിരവധി ടിപ്പര്‍ ലോറികളാണ് വന്നത്.പരിശോധന നടക്കുന്നതായി അറിഞ്ഞ് ഇവ റോഡ് വശത്ത് നിര്‍ത്തിയിടേണ്ടി വന്നു. പിന്നീട് രണ്ട് മണിക്കൂര്‍ കഴിഞ്ഞതിന് ശേഷമാണ് യാത്ര തുടര്‍ന്നത്.
എന്നാല്‍ ഒരു ഭാഗത്ത് പരിശോധന നടത്തിയതിന് ശേഷം മറ്റ് ഭാഗങ്ങളിലേക്ക് ഉദ്യോഗസ്ഥര്‍ നീങ്ങിയതോടെ വീണ്ടും ടിപ്പര്‍ ലോറികള്‍ സ്‌ക്കൂള്‍ സമയത്ത് സഞ്ചരിച്ചു. ചാരുംമൂട് വി.വി.എച്ച്.എസ്.എസിന് മുന്നില്‍ പരിശോധനക്കായി ഉദ്യോഗസ്ഥര്‍ നിലയുറപ്പിച്ചിരുന്നു. പിന്നീട് ചാരുംമൂട് ജംഗ്ഷന്‍, നൂറനാട്, കരിമുളക്കല്‍ എന്നിവടങ്ങളിലും പരിശോധന നടത്തി.മതിയായ ജീവനക്കാരില്ലാത്തത് വന്‍ പ്രതിസന്ധി ഉണ്ടാക്കുന്നതായി മോട്ടോര്‍ വകുപ്പ് ഉദ്യോഗസ്ഥര്‍ പറഞ്ഞു.
ലേണേഴ്‌സ്, പട്രോളിംഗ്, ഓഫീസ് പ്രവര്‍ത്തനം എന്നിവടങ്ങളില്‍ മതിയായ ഉദ്യോഗസ്ഥരെ നിയമിച്ചങ്കില്‍ മാത്രമെ നിരന്തരം പരിശോധന നടത്താന്‍ സാധിക്കുകയുള്ളൂവെന്ന് ചൂണ്ടിക്കാട്ടുന്നു.പൊലീസ് കൂടി പരിശോധനക്ക് തയ്യാറാകണമെന്നാവശ്യവും ശക്തമാണ്. നൂറനാട്, വള്ളികുന്നം, കുറത്തികാട് സ്റ്റേഷന്‍ അതിര്‍ത്തികള്‍ പങ്കിടുന്ന സ്ഥലമാണ് കെ.പി റോഡ്.
എന്നാല്‍ ടിപ്പര്‍ ലോറികള്‍ അമിത വേഗതയില്‍ നിയമം ലംഘിച്ച് ചെമണ്ണുമായി കണ്‍മുന്നില്‍ കൂടി പോയാലും ഇവര്‍ കാര്യമായി പരിശോധനക്ക് തയ്യാറാകുന്നില്ലന്നാക്ഷേപം ശക്തമാണ്.