ന്യൂഡല്‍ഹി: ജെയ്‌ഷെ മുഹമ്മദിന്റെ ബാലാകോട്ടിലെ പരിശീലന കേന്ദ്രത്തിനുനേരെ വ്യോമസേന നടത്തിയ മിന്നലാക്രമണത്തോടെ ആണവായുധങ്ങള്‍ കൈവശമുണ്ടെന്ന പാകിസ്താന്റെ പൊങ്ങച്ചം പൊളിഞ്ഞുവെന്ന് കേന്ദ്ര ധനമന്ത്രി അരുണ്‍ ജെയ്റ്റ്‌ലി.

ഒരു വാര്‍ത്താ ചാനലില്‍ നടന്ന ആപ് കി അദാലത്ത് എന്ന പരിപാടിക്കിടെയാണ് മന്ത്രിയുടെ പരാമര്‍ശം. ഇന്ത്യ പാകിസ്താനുമായി രണ്ട് തവണയിലധികം യുദ്ധത്തിലേര്‍പ്പെട്ടിട്ടുണ്ട്. ഇവയ്‌ക്കെല്ലാം ശേഷം ഇന്ത്യയുടെ സാമ്പത്തിക, സൈനിക ശക്തിയോട് നേരിട്ട് ഏറ്റുമുട്ടി ജയിക്കാനാവില്ലെന്ന് അവര്‍ തിരിച്ചറിഞ്ഞു.
പാക് സൈന്യത്തിന് ഇനി രണ്ടുമാര്‍ഗം മാത്രമേ ബാക്കിയുള്ളൂ. ഒന്ന് ഭീകരരെ ഉപയോഗിച്ച് ഇന്ത്യയ്‌ക്കെതിരേ നിഴല്‍യുദ്ധം നടത്തുക, രണ്ടാമത് ആണവായുധം ഉണ്ടെന്ന് വീമ്പുപറഞ്ഞ് നടക്കുക. ആ പൊങ്ങച്ചമാണ് ബാലാകോട്ട് ആക്രമണത്തോടെ തുറന്നുകാട്ടപ്പെട്ടതെന്നും ജയ്റ്റ്‌ലി പറഞ്ഞു. ഭീകരരെ ഇന്ത്യയിലേക്ക് കടത്തിവിട്ട് ആക്രമണം നടത്തുകയെന്നതാണ് പാകിസ്താന്റെ ഇതുവരെയുള്ള നയം. അതിനെ പ്രതിരോധിക്കുക എന്നതാണ് ഇന്ത്യ സ്വീകരിച്ചിരുന്ന നിലപാട്. ഭീകരരെ പ്രതിരോധിക്കുന്നതിനൊപ്പം അവരുടെ കേന്ദ്രങ്ങളില്‍ ചെന്ന് ആക്രമണം നടത്തുക എന്നതാണ് പുതിയ രീതി. 2016 ലെ മിന്നലാക്രമണമായിരുന്നു ഇതില്‍ ആദ്യത്തെ ചുവടുവയ്പ്പ്. രണ്ടാമത്തെ നടപടിയായിരുന്നു ബാലാകോട്ടിലെ വ്യോമാക്രമണം. ഇന്ത്യയുടെ നടപടികള്‍ക്ക് ലോകരാജ്യങ്ങളുടെ പിന്തുണയുണ്ടെന്നും ജെയ്റ്റ്‌ലി അവകാശപ്പെട്ടു.