മട്ടാഞ്ചേരി: ഫോര്‍ട്ട്‌കൊച്ചി-വൈപ്പിന്‍ റോ റോയില്‍ നാളെ മുതല്‍ ഇരുചക്ര വാഹനങ്ങളില്‍ യാത്ര ചെയ്യുന്നവര്‍ക്കും ടിക്കറ്റ് ഈടാക്കാന്‍ തീരുമാനം. നേരത്തേ ഇരുചക്ര വാഹനങ്ങള്‍ക്ക് പത്ത് രൂപയുടെ ടിക്കറ്റില്‍ പിറകിലിരിക്കുന്നവര്‍ക്കും യാത്ര ചെയ്യാമായിരുന്നു. ഇതാണ് ഇപ്പോള്‍ കിന്‍കോ മാറ്റുന്നത്.
നേരത്തേ ജങ്കാര്‍ സര്‍വിസ് നടത്തിയിരുന്നപ്പോഴും ഇത്തരത്തില്‍ സ്വകാര്യ നടത്തിപ്പുകാര്‍ക്ക് പിറകില്‍ യാത്ര ചെയ്യുന്നയാള്‍ക്ക് മൂന്ന് രൂപ ടിക്കറ്റ് ഈടാക്കാനുള്ള അനുവാദം നഗരസഭ നല്‍കിയിരുന്നു.
എന്നാല്‍ പ്രതിഷേധം ശക്തമായതോടെ നഗരസഭ തീരുമാനം പിന്‍വലിച്ചു. പിന്നീട് ഇതുവരെ ഇരുചക്ര വാഹനങ്ങളില്‍ പിറകില്‍ യാത്ര ചെയ്യുന്നവര്‍ക്ക് ടിക്കറ്റ് ഈടാക്കിയിരുന്നില്ല.
റോ റോ സര്‍വ്വീസ് നിലവില്‍ വന്നപ്പോഴും തീരുമാനത്തില്‍ മാറ്റമുണ്ടായിരുന്നില്ല. എന്നാല്‍ ഇപ്പോള്‍ കിന്‍കോ സര്‍വ്വീസ് ഏറ്റെടുത്തതോടെയാണ് പിറകില്‍ യാത്ര ചെയ്യുന്നവര്‍ക്കും ടിക്കറ്റ് ഈടാക്കാന്‍ തീരുമാനിച്ചത്. നഗരസഭയുടെ അനുവാദത്തോടെയല്ല കിന്‍കോ തീരുമാനമെടുത്തതെന്നാണ് വിവരം. കിന്‍കോ സര്‍വ്വീസ് ഏറ്റെടുത്തതോടെ നടത്തിപ്പില്‍ നഗരസഭക്ക് യാതൊരു നിയന്ത്രണവുമില്ലാത്ത അവസ്ഥയാണ്.
തീരുമാനത്തിനെതിരെ ശക്തമായ പ്രതിഷേധമുയര്‍ന്നിട്ടുണ്ട്. പാസഞ്ചേഴ്‌സ് അസോസിയേഷന്‍ കിന്‍കോ നിലപാടിനെതിരെ രംഗത്ത് വന്നിട്ടുണ്ട്.