കൊല്‍ക്കത്ത: രഞ്ജി ട്രോഫി സെമിയില്‍ കര്‍ണാടകയെ കീഴടക്കി വിദര്‍ഭ ഫൈനലില്‍. അഞ്ചു റണ്‍സിനാണ് വിദര്‍ഭ കര്‍ണാടയെ തോല്‍പ്പിച്ചത്. ആദ്യ ഇന്നിംങ്‌സില്‍ 114 റണ്‍സിന്റെ ലീഡ് നേടിയ ശേഷമാണ് കര്‍ണാടകയ്ക്ക് തോല്‍വിയേറ്റുവാങ്ങേണ്ടി വന്നത്. ഡല്‍ഹിയാണ് ഫൈനലില്‍ വിദര്‍ഭയുടെ എതിരാളികള്‍.

198 റണ്‍സ് വിജയലക്ഷ്യവുമായി ഇറങ്ങിയ കര്‍ണാടകയെ 192 റണ്‍സിന് വിദര്‍ഭ പുറത്താക്കുകയായിരുന്നു. കര്‍ണാടകയുടെ അഞ്ചു ബാറ്റ്‌സ്മാന്‍മാര്‍ രണ്ടക്കം കാണാതെ പുറത്തായി. 36 റണ്‍സെടുത്ത വിനയ് കുമാറാണ് ടോപ്പ് സ്‌കോറര്‍.

ഇന്നലെ കളി നിര്‍ത്തുമ്പോള്‍ ക്യാപ്റ്റന്‍ വിനയ് കുമാര്‍ (19), എസ് ഗോപാല്‍ (ഒന്ന്) എന്നിവരാണ് ക്രീസിലുണ്ടായിരുന്നത്. നാല് വിക്കറ്റുകള്‍ വീഴ്ത്തിയ രജ്‌നീഷ് കുര്‍ബാനിയുടെ മാരക ബൗളിങാണ് ഇന്നലെ കര്‍ണാടകയുടെ പ്രതീക്ഷകളെ തകിടം മറിച്ചത്. മത്സരത്തിലാകെ ഗുര്‍ബാനി 12 വിക്കറ്റാണ് വീഴ്ത്തിയത്.