ആന പാപ്പാന്‍ എന്നു കേള്‍ക്കുമ്പോള്‍ കൈയിലൊരു തോട്ടിയും വടിയുമേന്തി ഒരു തോര്‍ത്തുമുണ്ടുമിട്ട് ആനയ്‌ക്കൊപ്പം നടക്കുന്ന മനുഷ്യന്റെ രൂപമാണ് നമ്മുടെ മനസിലേക്ക് വരുക. എന്നാല്‍ ഇന്ത്യക്കു പുറത്ത് മറ്റ് ഏഷ്യന്‍ രാജ്യങ്ങളില്‍ ഇങ്ങനെയല്ല. ആന പാപ്പാന്‍മാരുടെ കൈയില്‍ വടിയോ തോട്ടിയോ ഒന്നുമുണ്ടാകില്ല. നമ്മുടെ സങ്കല്‍പത്തിനും അപ്പുറമാണ് അത്.

കഴിഞ്ഞദിവസം സമൂഹമാധ്യമങ്ങളില്‍ അത്തരമൊരു ആനകളുടെയും പാപ്പാന്റെയും വിഡിയോ വൈറലായിരുന്നു. മാത്രമല്ല, അവരൊരു സ്ത്രീയുമാണ്. നമ്മള്‍ ആണുങ്ങളെ മാത്രമേ പാപ്പാനായി ഇതുവരെ കണ്ടിട്ടുള്ളൂ. ലക് ചൈലര്‍ട്ട് എന്നാണ് അവരുടെ പേര്. മഴ പെയ്യുമ്പോള്‍ രണ്ട് ആനകള്‍ക്ക് നടുവില്‍ നിന്ന് തന്റെ മഴക്കോട്ട് ശരിയാക്കുകയായിരുന്നു അവര്‍.

തന്റെ ആനകളായ ചാബയും തോങ്എയുമാണത്. തുറസായ സ്ഥലത്തായിരുന്നു ഞങ്ങള്‍ മൂന്നു പേരും മഴ പെയ്യുമ്പോള്‍. പെട്ടെന്ന് ഇടിയും മിന്നലും മഴയും ശക്തമായപ്പോള്‍ ആനകള്‍ രണ്ടും തന്നെ മഴ നനയാതെ ചേര്‍ത്തുപിടിച്ചെന്നും തായ്‌ലന്‍ഡിലെ സേവ് എലിഫെന്റ് ഫൗണ്ടേഷന്റെ സ്ഥാപക കൂടിയായ ചൈലര്‍ട്ട് ഇന്‍സ്റ്റഗ്രാമില്‍ കുറിച്ചു. 

രണ്ടാനകളില്‍ ഒരാള്‍ ചെറുതായിരുന്നു. ചാബ എന്ന ആനയാണത്. ആനയുടെ  കഴുത്തിന് താഴെ തന്നെ സുരക്ഷിതമായി നിര്‍ത്തിയിരിക്കുകയാണ്. എന്നാല്‍ തന്റെ മഴക്കോട്ടിലെ ബട്ടണ്‍ ശരിക്കും ഇടാന്‍ പറ്റാതെയാകുന്നു അവര്‍ക്ക്. ഇത് ശരിയാക്കുന്നതിനിടെ ചാബ അവരെ തന്റെ തുമ്പിക്കൈകൊണ്ട് കെട്ടിപ്പിടിക്കാന്‍ ശ്രമിക്കുന്നു. അപ്പോള്‍ പാപ്പാനായ ഇവര്‍ ആനയ്‌ക്കൊരു മുത്തം കൊടുക്കുന്നു.

തിരിച്ചു തന്റെ തുമ്പിക്കൈ ഉയര്‍ത്തി അവരുടെ ചുണ്ടുകളിലും ചാബ മുത്തം കൊടുക്കുകയാണ്. ആനയുടെ കുസൃതി നിറഞ്ഞ സ്‌നേഹപ്രകടനം ഏവരെയും ആകര്‍ഷിക്കുന്നതാണ്. 'വിഷമിക്കേണ്ട എല്ലാം ശരിയാകും' എന്നു ചാബ പറയുന്ന പോലെ തനിക്കു തോന്നിയെന്നും അവര്‍ ഇന്‍സ്റ്റയില്‍ എഴുതി. അപ്പോള്‍ മറ്റേ ആനയും സ്‌നേഹം പ്രകടിപ്പിക്കാന്‍ തനിക്കും അവസരം നല്‍കണമെന്ന രീതിയില്‍ തനിക്ക് മുത്തം നല്‍കാനും ചേര്‍ത്തുപിടിക്കാനും ശ്രമിക്കുന്നതും പാപ്പാനെ നടുക്ക് നിര്‍ത്തി ആനകള്‍ മുന്നോട്ടു നടക്കാന്‍ ശ്രമിക്കുന്നതുമാണ് വിഡിയോ.

വൈകാരിക ജീവികളാണ് ആനയും. അവര്‍ക്ക് സ്‌നേഹവും കരുതലും മനുഷ്യരോടുണ്ടെന്ന് അവര്‍ എഴുതി. ആനകള്‍ ആരെയെങ്കിലും വിശ്വസിക്കുന്നുണ്ടെങ്കില്‍ അവര്‍ അവരിലൊരാളായി തന്നെ അവരെ കൂടെ കൂട്ടും. മനുഷ്യരായ നമുക്ക് മൃഗമായിട്ടല്ലാതെ ആനകളെ കാണാന്‍ കഴിഞ്ഞാല്‍ അവയുടെ സൗമ്യതയും ആത്മാര്‍ത്ഥതയും നമുക്കു കാണാന്‍ പറ്റുമെന്നും പാപ്പാന്‍. നിരവധിപേരാണ് വിഡിയോക്ക് കമന്റുമായി വന്നിരിക്കുന്നത്.