വെളിച്ചെണ്ണ, ഒലിവ് ഓയില്‍, പാമൊലിന്‍, സണ്‍ഫഌര്‍ ഓയില്‍ തുടങ്ങി നാം നിത്യേന പാചകത്തിനും മറ്റും ഉപയോഗിക്കുന്ന എണ്ണകള്‍ പലതരത്തിലുണ്ട്. നമ്മുടെ വീടുകളില്‍ വെളിച്ചെണ്ണയാണ് പണ്ടു മുതലേ പാചകത്തിനായി ഉപയോഗിക്കുന്നത്. ഇത് വീടുകളില്‍ തന്നെയായിരുന്നു അന്ന് തയ്യാറാക്കിയിരുന്നതും. അതുകൊണ്ട് തന്നെ മായമില്ലാത്ത, ശുദ്ധമായ വെളിച്ചെണ്ണയായിരുന്നു അത്. 

ഇന്നു കാലം മാറി. എല്ലാ സാധനങ്ങളും വാങ്ങുന്ന പോലെ വെളിച്ചെണ്ണയും കടകളില്‍ നിന്നു തന്നെയാണ് വാങ്ങുന്നത്. ഇതോടെ മായം കലര്‍ന്ന വെളിച്ചെണ്ണ നമുക്ക് കിട്ടുകയും ഉപയോഗിക്കുകയും ചെയ്യുന്നു. എന്നാല്‍ വെളിച്ചെണ്ണയില്‍ മായം കലര്‍ന്നിട്ടുണ്ടോ എന്ന് നമുക്ക് വീട്ടില്‍ തന്നെ പരീക്ഷിച്ചു നോക്കാവുന്നതാണ്. ഇതിനായി ചില പൊടിക്കൈകള്‍ പ്രയോഗിച്ചാല്‍ മതി. 

രണ്ടു ടീസ്പൂണ്‍ വെളിച്ചെണ്ണ ചീനച്ചട്ടിയില്‍ എടുത്ത് ഒരു മിനിറ്റ് ചൂടാക്കുക. മായം കലര്‍ന്ന വെളിച്ചെണ്ണ ചൂടാവുമ്പോള്‍ കരിഞ്ഞ മണമാണ് വരുക. അതേസമയം നല്ല വെളിച്ചെണ്ണയാണെങ്കില്‍ അതിന്റെ യഥാര്‍ഥ മണം നമുക്ക് പെട്ടെന്നു തന്നെ മനസിലാവുകയും ചെയ്യും. ഇങ്ങനെ ചെയ്തു നോക്കുക.

വെളിച്ചെണ്ണ കുപ്പി ഫ്രിഡ്ജില്‍ ഒന്നോ രണ്ടോ മണിക്കൂര്‍ സൂക്ഷിക്കുക. മായം കലര്‍ന്നതാണെങ്കില്‍ കുപ്പിയുടെ മുകളില്‍ ദ്രാവകാവസ്ഥയില്‍ നിറവ്യത്യാസം കാണാന്‍ കഴിയും.

 ഫ്രിഡ്ജില്‍ രണ്ടു മണിക്കൂര്‍ വച്ചിട്ടും വെളിച്ചെണ്ണ വെളുത്ത നിറത്തോടെ മുഴുവനും ഉറഞ്ഞതായി കാണുന്നുണ്ടെങ്കില്‍ അത് മായം കലരാത്ത നല്ല വെളിച്ചെണ്ണയായിരിക്കും.  ഇങ്ങനെ നിങ്ങള്‍ക്ക് പരീക്ഷിച്ചു നോക്കാവുന്നതാണ്