കൊച്ചി: ജഡ്ജിമാർക്കെതിരേ ഫേസ്ബുക്ക് പോസ്റ്റിട്ടയാൾക്ക്  മൂന്ന് ദിവസത്തെ  തടവു ശിക്ഷ വിധിച്ച് ഹൈക്കോടതി. എറണാകുളം ആലങ്ങാട് സ്വദേശി പി.കെ സുരേഷ്‌കുമാറിനെയാണ് കോടതി ശിക്ഷിച്ചത്. ജസ്റ്റിസുമാരായ ദേവൻ രാമചന്ദ്രനും ദേവസ്വം ബെഞ്ചിനുമെതിരേ ആയിരുന്നു ഫേസ്ബുക്ക് പോസ്റ്റുകൾ.
 
ജസ്റ്റിസുമാരായ രാജ വിജയരാഘവനും, ജോബിൻ സെബാസ്റ്റ്യനും അടങ്ങുന്ന ഡിവിഷൻ ബെഞ്ചാണ് ക്രിമിനൽ കോടതിയലക്ഷ്യ കേസിൽ പ്രതിയെ ശിക്ഷിച്ചത്. സമാന രീതിയിലുള്ള ഫേസ്ബുക്ക് പോസ്റ്റുകളെ തുടർന്ന് നേരത്തെയും പ്രതിക്കെതിരേ ക്രിമിനൽ കോടതിയലക്ഷ്യ കേസ് എടുത്തിരുന്നെങ്കിലും മാപ്പ് അപേക്ഷിച്ചതിനെ തുടർന്ന്  നടപടികൾ അവസാനിപ്പിച്ചിരുന്നു. പിന്നെയും സമൂഹമാധ്യമ പോസ്റ്റിട്ടതോടെയാണ്  കോടതി വീണ്ടും ക്രിമിനൽ കോടതിയലക്ഷ്യ നടപടികൾ സ്വീകരിച്ചത്.