കോഴിക്കോട്: കോഴിക്കോട് എന്‍ഐടിയില്‍ പൂനെ സ്വദേശിയായിരുന്ന വിദ്യാര്‍ഥി ആത്മഹത്യ ചെയ്ത സംഭവത്തില്‍ കേന്ദ്ര വിജിലന്‍സ് കമ്മീഷന്റെ ഇടപെടല്‍. വിശദമായ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ കമ്മീഷന്‍ എന്‍ ഐടി വിജിലന്‍സ് വിഭാഗത്തിന് നിര്‍ദേശം നല്‍കി. സഹപാഠികളില്‍ നിന്നേറ്റ മാനസിക പീഡനം മൂലമാണ് വിദ്യാര്‍ഥി ആത്മഹത്യ ചെയ്തതെന്നാണ് ആരോപണം. 

2024 മെയ് 6നായിരുന്നു സംഭവം. പൂനെ സ്വദേശിയായ യോഗേശ്വര്‍ നാഥെന്ന വിദ്യാര്‍ഥിയാണ് ഹോസ്റ്റല്‍ കെട്ടിടത്തിന് മുകളില്‍ നിന്ന് ചാടി ആത്മഹത്യ ചെയ്തത്. സഹപാഠികളായ മൂന്ന് വിദ്യാര്‍ഥികളില്‍ നിന്ന് മകന് മാനസികവും, ശാരീരികവുമായ പീഡനം ഏല്‍ക്കേണ്ടി വന്നിട്ടുണ്ടെന്നാണ് കുടുംബത്തിന്റെ ആരോപണം. മാത്രമല്ല അധ്യാപകര്‍ മകന് വേണ്ട പിന്തുണ നല്‍കിയില്ലെന്നും കുടുംബം ആരോപിച്ചു. 

കുറ്റക്കാര്‍ക്കെതിരെ നടപടി ആവശ്യപ്പെട്ട് എന്‍ഐടിയിലും സിറ്റി പൊലീസ് കമ്മീഷണര്‍ക്കും യുജിസി ആന്റി റാഗിങ് സെല്ലിനും ബന്ധുക്കള്‍ പരാതി നല്‍കിയെങ്കിലും അന്വേഷണത്തില്‍ കാര്യമായ പുരോഗതി ഉണ്ടായില്ല. ഇതോടെയാണ് യൂത്ത് കോണ്‍ഗ്രസ് വിഷയത്തില്‍ ഇടപ്പെട്ടത്. കേന്ദ്ര വിജിലന്‍സ് കമ്മീഷന് പരാതി നല്‍കുകയായിരുന്നു. ക്യാമ്പസിലെ വിദ്യാര്‍ഥികളുടെ ആത്മഹത്യകള്‍, പട്ടികജാതി പട്ടികവര്‍ഗ്ഗ വിദ്യാര്‍ത്ഥികള്‍ക്കെതിരായ അതിക്രമങ്ങള്‍ എന്നിവ അന്വേഷിക്കണം എന്നായിരുന്നു ആവശ്യം. ഈ പരാതിയിലാണ് കേന്ദ്ര വിജിലന്‍സ് കമ്മീഷന്റെ നടപടി.

ALSO READ: സായുധ സേനകളുടെ പ്രവർത്തന ശേഷി വർധിപ്പിക്കാൻ 67,000 കോടി രൂപയുടെ പദ്ധതി; അം​ഗീകാരം നൽകി ഡിഫൻസ് അക്വിസിഷൻ കൗൺസിൽ