പത്തനംതിട്ട: വാട്ടർ പ്യൂരിഫയർ സർവീസിനായി ഓൺലൈനിൽ കണ്ട ടോൾ ഫ്രീ നമ്പറിൽ വിളിച്ച 52 വയസ്സുകാരനായ പത്തനംതിട്ട സ്വദേശിക്ക് സൈബർ തട്ടിപ്പിൽ 95,000 രൂപ നഷ്ടപ്പെട്ടു. 2025 ഓഗസ്റ്റ് 23-നാണ് ഈ സംഭവം നടന്നതെന്ന് പൊലിസ് അറിയിച്ചു.

പ്രശസ്തമായ ഒരു വാട്ടർ പ്യൂരിഫയർ കമ്പനിയുടെ കസ്റ്റമർ കെയർ നമ്പർ ഓൺലൈനിൽ തപ്പിയപ്പോൾ, പരാതിക്കാരന് ലഭിച്ചത് തട്ടിപ്പുകാർ പോസ്റ്റ് ചെയ്ത വ്യാജ ടോൾ ഫ്രീ നമ്പറാണ്. ആ നമ്പറിൽ ഫോൺ വിളിച്ച ഉടനെ, ഒരു കമ്പനി പ്രതിനിധി ഉടൻ ബന്ധപ്പെടുമെന്ന് തട്ടിപ്പുകാർ ഉറപ്പ് നൽകി.

അതേ ദിവസം, തന്റെ കമ്പനി എക്സിക്യൂട്ടീവ് ആണെന്ന് പരിചയപ്പെടുത്തിയ ഒരാൾ പരാതിക്കാരനെ തിരികെ വിളിച്ചു. സർവീസ് ആരംഭിക്കുന്നതിനായി ഒരു ലിങ്ക് അയച്ചുകൊടുക്കുകയും, ആ ലിങ്ക് വഴി ഒരു ആപ്പ് ഡൗൺലോഡ് ചെയ്യാൻ ആവശ്യപ്പെടുകയും ചെയ്തു. ഈ ആപ്പ് ഒരു റിമോട്ട് ആക്സസ് ആപ്പാണെന്ന് തിരിച്ചറിയാതെ പരാതിക്കാരൻ അവർ നൽകിയ നിർദ്ദേശങ്ങൾ പാലിച്ചു.

ആപ്പ് ഇൻസ്റ്റാൾ ചെയ്ത ഉടനെ, ഇദ്ദേഹത്തിന്റെ ബാങ്ക് അക്കൗണ്ടിൽ നിന്ന് മൂന്ന് അനധികൃത യു.പി.ഐ. ഇടപാടുകളിലൂടെ 95,000 രൂപ നഷ്ടമായി. തട്ടിപ്പുകാർ വ്യാജ ടോൾ ഫ്രീ നമ്പറുകൾ ഓൺലൈനിൽ പോസ്റ്റ് ചെയ്യുകയും, റിമോട്ട് ആക്സസ് ആപ്പ് ഉപയോഗിച്ച് ഇരയുടെ ഫോൺ നിയന്ത്രിക്കുകയും പണം തട്ടിയെടുക്കുകയും ചെയ്തതായി പൊലിസ് അന്വേഷണത്തിൽ കണ്ടെത്തി.

പരാതിയെ തുടർന്ന്, പത്തനംതിട്ട സൈബർ പൊലിസ് സ്റ്റേഷൻ ഭാരതീയ ന്യായ സംഹിത (BNS) യുടെയും ഇൻഫർമേഷൻ ടെക്‌നോളജി ആക്ടിന്റെയും വിവിധ വകുപ്പുകൾ പ്രകാരം കേസ് രജിസ്റ്റർ ചെയ്തു. നഷ്ടപ്പെട്ട തുക വീണ്ടെടുക്കുന്നതിനും തട്ടിപ്പുകാരുടെ ബാങ്ക് അക്കൗണ്ടുകൾ കണ്ടെത്തുന്നതിനും പൊലിസ് ശ്രമങ്ങൾ തുടരുകയാണ്.

അവധിക്കാല സീസണിൽ ഇത്തരം സൈബർ തട്ടിപ്പുകൾ വർദ്ധിക്കാൻ സാധ്യതയുണ്ടെന്ന് പൊലിസ് മുന്നറിയിപ്പ് നൽകി. ആധികാരിക കമ്പനി വെബ്സൈറ്റുകളിൽ നിന്ന് മാത്രം കസ്റ്റമർ കെയർ വിവരങ്ങൾ ശേഖരിക്കാൻ പൊതുജനങ്ങൾ ശ്രദ്ധിക്കണമെന്നും പൊലിസ് അരിയിപ്പ് നൽകി.

സൈബർ തട്ടിപ്പുകൾക്കെതിരെ പരാതികൾ രജിസ്റ്റർ ചെയ്യാൻ https://cybercrime.gov.in/ എന്ന വെബ്സൈറ്റ് ഉപയോഗിക്കാം. ഈ വെബ്സൈറ്റ് വഴി പരാതികൾ ട്രാക്ക് ചെയ്യാനും നടപടികളെക്കുറിച്ച് അറിയാനും സാധിക്കും. വ്യാജ കോളുകളോടോ സന്ദേശങ്ങളോടോ പ്രതികരിക്കാതെ ജാഗ്രത പാലിക്കണമെന്നും പൊലിസ് നിർദ്ദേശിച്ചു.