ന്യൂഡല്‍ഹി: കേന്ദ്ര സര്‍ക്കാരിന്റെ ഗ്രാമീണ കുടിവെള്ള പദ്ധതിയായ ജല്‍ജീവന്‍ മിഷനില്‍ വ്യാപക അഴിമതി. രാജ്യത്താകമാനം 596 കേസുകളാണ് ഇതുവരെ റിപ്പോര്‍ട്ട് ചെയ്തത്. ഉദ്യോഗസ്ഥരും, കോണ്‍ട്രാക്ടര്‍മാരും, ഏജന്‍സികളും അഴിമതിയില്‍ പങ്കാളിയായി. 

രാജ്യത്തെ എല്ലാ ഗ്രാമീണ വീടുകളിലും പൈപ്പുവഴി കുടിവെള്ളമെത്തിക്കുമെന്ന പ്രഖ്യാപനത്തോടെ 2019ല്‍ കേന്ദ്രസര്‍ക്കാര്‍ പ്രഖ്യാപിച്ച പദ്ധതിയാണ് ജല്‍ജീവന്‍ മിഷന്‍ പദ്ധതി. ആരംഭിച്ച് കുറച്ച് വര്‍ഷങ്ങള്‍ക്കുള്ളില്‍ നിന്ന് വ്യാപക പരാതികളാണ് പദ്ധതിക്കെതിരെ ഉയര്‍ന്നത്. ഇതുവരെ 16,634 പരാതികള്‍ രജിസ്റ്റര്‍ ചെയ്തിട്ടുണ്ട്. 

ALSO READ: യുപിയിലെ എല്ലാ സ്‌കൂളുകളിലും വന്ദേമാതരം നിര്‍ബന്ധമാക്കും; വന്ദേമാതരത്തെ എതിര്‍ത്തതാണ് ഇന്ത്യ വിഭജനത്തിന് കാരണമായത്; യോഗി ആദിത്യനാഥ്

പതിനഞ്ച് സംസ്ഥാനങ്ങളിലും, കേന്ദ്രഭരണ പ്രദേശങ്ങളിലുമായി വ്യാപക തട്ടിപ്പാണ് പദ്ധതിയുടെ പേരില്‍ നടന്നത്. ഇതില്‍ ഏറ്റവും കൂടുതല്‍ പരാതികള്‍ ഉയര്‍ന്നത് ഉത്തര്‍പ്രദേശില്‍ നിന്നാണ്. മൊത്തം പരാതികളില്‍ 85 ശതമാനവും യുപിയില്‍ നിന്നാണ്. തൊട്ടുപിന്നില്‍ ആസാം, ത്രിപുര സംസ്ഥാനങ്ങളുമാണുള്ളത്. ഛത്തീസ്ഗഡ്, ഗുജറാത്ത്, ഹരിയാന, ജാര്‍ഖണ്ഡ്, മേഖാലയ, മിസോറാം, ഉത്തരാഖണ്ഡ് സംസ്ഥാനങ്ങളാണ് ലിസ്റ്റില്‍ ബാക്കിയുള്ളത്. 

പരാതിയില്‍ അന്വേഷണം നടത്തി ഇതുവരെ 596 ഉദ്യോഗസ്ഥര്‍ക്കും, 822 കോണ്‍ട്രാക്ടര്‍മാര്‍ക്കും, 152 തേഡ് പാര്‍ട്ടി ഏജന്‍സികള്‍ക്കുമെതിരെ നടപടി എടുത്തിട്ടുണ്ട്. യുപിയില്‍ 171 ഉദ്യോഗസ്ഥര്‍ക്കെതിരെയും, രാജസ്ഥാന്‍ 170, മധ്യപ്രദേശ് 151 എന്നിങ്ങനെ ഉദ്യോഗസ്ഥര്‍ക്കെതിരെ കേസെടുത്തിട്ടുണ്ട്. ഡിപ്പാര്‍ട്ട്‌മെന്റ് ഓഫ് ഡ്രിങ്കിങ് വാട്ടര്‍ ആന്റ് സാനിറ്റേഷനാണ് പരാതികള്‍ അന്വേഷിച്ചത്.