അർജന്റൈൻ ഇതിഹാസം ലയണൽ മെസിയെ പരിശീലിപ്പിക്കാൻ ആഗ്രഹമുണ്ടോയെന്ന ചോദ്യത്തിന് മറുപടി നൽകിയിരിക്കുകയാണ് ബാഴ്സലോണ പരിശീലകൻ ഹാൻസി ഫ്ലിക്ക്. മെസി കഴിഞ്ഞ 10 വർഷത്തിനിടെയുള്ള ഏറ്റവും മികച്ച താരം ആണെന്നും എന്നാൽ കരാറുമായി ബന്ധപ്പെട്ട കാര്യങ്ങൾ ഇതിനു തടസ്സമാവുമെന്നുമാണ് ബാഴ്സ പരിശീലകൻ വ്യക്തമാക്കിയത്. 

''എന്തുകൊണ്ട് പാടില്ല? കഴിഞ്ഞ 10 വര്ഷത്തിനിടയിലെ ഏറ്റവും മികച്ച താരമാണ് മെസി. അദ്ദേഹം ഫുട്ബോൾ കളിക്കുന്നത് ഞാൻ എപ്പോഴും ആസ്വദിച്ചിട്ടുണ്ട്. അദ്ദേഹം ഏത് ടീമിനും അനുയോജ്യനാവും. പക്ഷെ അദ്ദേഹത്തിന്റെ കരാർ 2028ലും എന്റേത് 2027ളുമാണ് അവസാനിക്കുന്നത്. അതിനാൽ ഇതൊരു ചോദ്യമല്ല'' ഹാൻസി ഫ്ലിക്ക് പറഞ്ഞു. 

ബാഴ്‌സലോണയിൽ പന്തുതട്ടിയാണ് മെസി ഇതിഹാസമായി മാറിയത്. 2021ലാണ് മെസി ബാഴ്സലോണക്കൊപ്പമുള്ള തന്റെ ഐതിഹാസികമായ കരിയർ അവസാനിപ്പിച്ചുകൊണ്ട് പിഎസ്ജിയിലേക്ക് കൂടുമാറിയത്. സാമ്പത്തിക പ്രശ്നങ്ങൾ കാരണം കരാർ പുതുക്കാൻ കഴിയാത്തതിന് പിന്നാലെയാണ് മെസി ബാഴ്സ വിടാൻ നിർബന്ധിതനായത്. ബാഴ്സലോണക്കായി 778 മത്സരങ്ങളിൽ നിന്നും 672 ഗോളുകളും 303 അസിസ്റ്റുകളും ആണ് മെസി നേടിയിട്ടുള്ളത്.

പിഎസ്ജിയിൽ രണ്ട് സീസണിൽ ബൂട്ട് കെട്ടിയ മെസി 2023ൽ ഇന്റർ മയാമിയിലേക്കും ചേക്കേറി. മെസിയുടെ വരവിനു പിന്നാലെ മേജർ ലീഗ് സോക്കറിന് കൃത്യമായ ഒരു മേൽവിലാസം ഉണ്ടാക്കിയെടുക്കാൻ സാധിച്ചിരുന്നു. മെസിയുടെ വരവോടെ ഇന്റർ മയാമി ലീഗിൽ മിന്നും പ്രകടനമായിരുന്നു മയാമി നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. 

അതേസമയം എംഎൽഎസ് കോൺഫറൻസ് സെമി ഫൈനലിൽ കഴിഞ്ഞ ദിവസം നടന്ന മത്സരത്തിൽ സിൻസിനാറ്റിക്കെതിരെ എതിരില്ലാത്ത നാലു ഗോളുകൾക്കായിരുന്നു ഇന്റർ മയാമിയുടെ വിജയം. മത്സരത്തിൽ ഒരു ഗോളും ഹാട്രിക് അസിസ്റ്റും നേടി മിന്നും പ്രകടനമാണ് മെസി നടത്തിയത്. ഇതോടെ ഫുട്ബോളിന്റെ ചരിത്രത്തിൽ ഒരു താരത്തിനും അവകാശപ്പെടാൻ സാധിക്കാത്ത ഒരു റെക്കോർഡും മെസി സ്വന്തമാക്കി. ഫുട്ബോളിൽ 1300 ഗോൾ കോൺട്രിബ്യുഷൻസ് സ്വന്തമാക്കുന്ന ആദ്യ താരമായാണ് മെസി മാറിയത്. ഇതുവരെ 1134 മത്സരങ്ങളിൽ നിന്നും 896 ഗോളുകളും 404 അസിസ്റ്റുകളുമാണ് മെസി നേടിയിട്ടുള്ളത്. 

Barcelona coach Hansi Flick has responded to a question about whether he would like to coach Argentine legend Lionel Messi. The Barca coach stated that Messi is the best player in the last 10 years, but contractual issues would be an obstacle to this.