കണ്ണൂർ: കണ്ണപുരം കീഴറയിലെ വാടക വീട്ടിൽ നടന്ന വൻസ്‌ഫോടനത്തിൽ ഒരാൾ കൊല്ലപ്പെട്ടതായി സ്ഥിരീകരിച്ചെങ്കിലും മരിച്ചത് ആരെന്ന് തിരിച്ചറിഞ്ഞില്ല. ഗോവിന്ദൻ കീഴറയെന്ന അധ്യാപകന്റെ ഉടമസ്ഥതയിലുള്ളതാണ് വീട്. ഒരുവർഷം മുൻപ് പടുവിലായി സ്വദേശി അനൂപ് എന്ന വ്യക്തിയ്ക്ക് വീട് വാടകയ്ക്ക് നൽകിയിരുന്നു. ഇവിടെയാണ് സ്‌ഫോടനമുണ്ടായത്. സ്‌ഫോടനത്തിൽ വീട് പൂർണമായും തകർന്നു. 

രണ്ടുപേരാണ് വാടകയ്ക്ക് എടുത്ത വീട്ടിൽ താമസിച്ചിരുന്നത് എന്നാണ് പ്രാഥമിക നിഗമനം. സ്‌ഫോടനത്തിൽ ഒരാൾ കൊല്ലപ്പെട്ടിട്ടുണ്ട്. മൃത ശരീരം ചിന്നിച്ചിതറിയ അവസ്ഥയിലാണുള്ളത്. ശരീരഭാഗങ്ങൾ ഇൻക്വസ്റ്റ് നടത്തി ആശുപത്രി മോർച്ചറിയിലേക്ക് മാറ്റും. മരിച്ചത് ആരാണെന്നതിൻ്റെ സൂചനകൾ പുറത്തുവരുന്നുണ്ടെങ്കിലും പൊലിസ് ഇതുവരെ സ്ഥിരീകരിച്ചിട്ടില്ല. കണ്ണൂർ സിറ്റി പൊലിസ് കമ്മിഷണർ ഉൾപ്പെടെ സ്ഥലത്ത് ക്യാംപ് ചെയ്യുന്നുണ്ട്. 

പൊട്ടിയത് ഉഗ്രസ്ഫോടനശേഷിയുള്ള നാടൻ ബോംബാണെന്നാണ് പ്രാഥമിക നിഗമനം. തകർന്ന് വീടിന്റെ അവശിഷ്ടങ്ങൾക്കൊപ്പം ഏതാനും ബോംബുകൾ പൊട്ടാതെ ഇവിടെ നിന്നും കണ്ടെത്തിയിട്ടുണ്ട്. സ്ഫോടനത്തിൻ്റെ ആഘാതത്തിൽ സമീപത്തെ വീടുകൾക്കും കേടുപാടുകൾ പറ്റിയതായി റിപ്പോർട്ട് ഉണ്ട്. നിരവധി വീടുകളുടെ വാതിലുകൾ തകരുകയും ചുമരുകളിൽ വിള്ളലുകൾ വീഴുകയും ചെയ്തതായാണ് റിപ്പോർട്ട്.

ALSO READ: കണ്ണൂരിൽ വീടിനുള്ളിൽ വൻസ്‌ഫോടനം; ശരീര അവശിഷ്ടങ്ങൾ ചിന്നിച്ചിതറിയ നിലയിൽ, അപകടം ബോംബ് നിർമാണത്തിനിടെയെന്ന് സൂചന

പയ്യന്നൂരിൽ ഹാർഡ് വെയർ നടത്തിവരികയാണെന്ന് പറഞ്ഞാണ് അനൂപ് വീട് വാടകയ്ക്ക് എടുത്തതെന്നാണ് വിവരം. എന്നാൽ ഇയാൾ 2016 ൾ ഉണ്ടായ മറ്റൊരു സ്‌ഫോടനക്കേസിലെ പ്രതിയാണ്. അനൂപ് ഉൾപ്പെടെ രണ്ടു പേരാണ് ഇവിടെ താമസിച്ചിരുന്നത്. അയൽവാസികളുമായി ഇവർക്ക്  ബന്ധമൊന്നുമുണ്ടായിരുന്നില്ല. രാത്രികാലങ്ങളിൽ അപരിചിതരായ ചിലർ രാത്രി സമയങ്ങളിൽ ഇവിടെ വന്നു പോകുന്നത് ശ്രദ്ധയിൽപ്പെട്ടിട്ടുണ്ടെന്ന് അയൽവാസികൾ പൊലിസിന് മൊഴി നൽകിയിട്ടുണ്ട്. 

പുലർച്ചെയാണ് നാടിനെ ഞെട്ടിച്ച് സ്‌ഫോടനമുണ്ടായത്. രണ്ട് മണിയോടെയാണ് ഉഗ്രശബ്ദത്തിൽ സ്ഫോടനം നടന്നത്. ഓടിയെത്തിയ നാട്ടുകാർ വീട് തകർന്ന നിലയിലാണ് കണ്ടത്. അപകടവിവരമറിഞ്ഞ് കണ്ണപുരം പൊലിസും തളിപ്പറമ്പിൽ നിന്നുള്ള ഫയർഫോഴ്സ് സംഘവും സ്ഥലത്തെത്തി. സ്ഥലത്ത് ബോംബ് സ്ക്വാഡ് പരിശോധന നടത്തുകയാണ്. 

Hours after an explosion in Kannapuram, Keezhara Kannur, the identity of the deceased remains unknown. There is no clear details about the inmates of the rented house. Mystery from top to bottom.